ب هه‌لكه‌فتا یوبیلا زێرین و 50 سالیا پارێزگه‌هبونا دهوكێ ئه‌ڤرو ئێڤارى 27\5\2019 ل هوڵا كونفرانسا ب ئاماده‌بوونا پارێزگه‌رێ دهوكێ به‌رێز فه‌رهاد ئه‌مین ئه‌تروشى و جێگرێن پارێزگه‌رى و قایمقام و رێڤه‌به‌رێن ناحیان و رێڤه‌به‌ر و كارمه‌ندێن فه‌رمانگه‌هێن پارێزگه‌ها دهوكێ رێڤه‌به‌ریا گشتى یا ره‌وشه‌نبیرى و هونه‌رى ل دهوكێ ب هه‌ڤكارى دگه‌ل سه‌روكاتیا باژێرڤانیا دهوكێ و ب پشته‌ڤانیا پارێزگه‌رێ دهوكێ ئاهه‌نگا كه‌رنه‌ڤالێ 7ێ یا پارێزگه‌هبونا دهوكێ هاته سازكرن.
پاشى پارێزگه‌رێ دهوكێ په‌یڤه‌ك پێشكێشكر و بخێرهاتنا هه‌موو به‌رهه‌ڤبویان كر و پیروزباهیا هه‌موو خه‌لكێ پارێزگه‌هێ كر و 50 سالیا پارێزگه‌هبوونا دهوكێ ل هه‌ر تاكه كه‌سه‌كێ پارێزگه‌هێ پیروزكر و خواست سالێن بهێت سالێن خێر و خوشى و پتر پێشڤه‌چوونێ بن بو خه‌لكێ پارێزگه‌هێ .
پارێزگه‌رێ دهوكێ ئاماژه داسالێن قه‌یرانا دارایى یێن ب سه‌ر هه‌رێمێ و پارێزگه‌ها دهوكێ هاتین و گوت سه‌ره‌راى هه‌بوونا قه‌یرانا دارایى و هاتنا ژماره‌كا زوڕ یا ئاواره و په‌نابه‌ران كار و خزمه‌ت ل دویف شیانا هاتینه كرن.
پارێزگه‌رێ دهوكێ دیار كر كو پارێزگه‌هبونا دهوكێ ل سالا 1969 ژ به‌رهه‌مێ شوره‌شا ئه‌یلولێ ویه و ژ سالا 1991 هه‌تا سالێن 2003 و 2005 ێ ده‌ستكه‌فتێن باش هاتینه ده‌ست وه‌كو ئاڤاكرنا زانكو په‌یمانگه‌ها و قه‌زا و ناحیێن نوو و پشتى سالا 2005 دهوك پاشڤه مایه و پێدڤیه هه‌وڵبده‌ین دهوك وه‌كو پارێزگه‌هێن دى یێن هه‌رێمێ پێش بكه‌ڤیت وگوت ل سالا 2014 مه پلانه‌كا رێك و پێك هه‌بوو لێ چه‌ندین قه‌یران بسه‌ر ده‌ڤه‌رێ دا هاتن ه پلان هاتنه راگرتن.
پارێزگه‌رێ دهوكێ ته‌كه‌ز كر كو ب ره‌نگه‌كێ گشتى هه‌تا سالا 2019 پارێزگه‌ها دهوكێ پێشكه‌فتن بخوڤه دیتیه و گه‌له‌ك پروژێن باش هاتینه ئه‌نجامدان لێ ده‌ڤه‌رێ پیدڤى ب گه‌له‌ك پروژێن دى یێن گرنگ هه‌یه.
ل دوماهیێ ژى گوت سه‌ره‌راى نه‌بونا بودجێ ل ڤان پێنج سالێن بورى خه‌لكێ دهوكێ رویه‌كێ جان نیشا جڤاكێ ده‌وله‌تى دایه ئه‌وژى ب حه‌واندنا ژماره‌كا زور یا ئاواره و په‌نابه‌ران و ژبه‌ر هه‌لویستێ خه‌لكێ پارێزگه‌هێ گه‌له‌ك رێكخراوێن خێرخاز پروژێن خزمه‌تكارى یێن گرنگ ئه‌نجامداینه.
پاش په‌نه‌لێ ره‌وشه‌نبیرى هاته پێشكێشكرن د. حسن احمد قاسم ل سه‌ر شوینوارێن دهوكێ و ماموستا عصمت خابور ل دور باژێریبوونێ و د. زرار ل دور مێژوویا دهوكێ ئاخفتن پاش گه‌نگه‌شه لسه‌ر ته‌وه‌رێن په‌نه‌لى هاتنه كرن هه‌ر بڤێ هه‌لكه‌فتێ كارگێریا پارێزگه‌هێ فتاره‌ك بو به‌رهه‌ڤبوویێن چالاكیێ ئاماده‌كر.
بریار ئه‌وه پشتى جه‌ژنێ ل روژێن 12 و 13 یێن هه یڤا 6 به‌رده‌وامى ب چالاكیێن 50سالیا پارێزگه‌هبوونا دهوكێ بهێته دانان.
