ئه‌ڤرۆ سپێدێ 12-10-2020 به‌رێز د.على ته‌ته‌ر پارێزگه‌رێ دهۆكێ هه‌ڤدیتنه‌ك دگه‌ل (رۆب وۆله‌ر) كونسلێ گشتى یێ وه‌لاتێ ئه‌مریكا ل كوردستانێ كر.
دهه‌ڤدتنێدا ب ئاماده‌بونا ماجد سه‌ید صالح جێگرێ پارێزگه‌رێ دهۆكێ ب وه‌كاله‌ت به‌حسێ په‌یوه‌ندیێن دوو قولى دناڤبه‌را هه‌رێما كوردستانێ وئه‌مریكا وره‌وشا ئه‌منى ل ده‌ڤه‌رێ وره‌وشا ئاواره وپه‌ناهندا وئه‌و خزمه‌تێن بو دهێنه پێشكێشكرن وپێرابونێن پارێزگه‌ها دهۆكێ گرتینه به‌ر بو به‌رهنگاربونا ڤایروسێ كورونا هاته كرن.
دته‌وه‌ره‌كێ دن دا به‌حسێ پرۆژێن خزمه‌تگوزارى ل پارێزگه‌هێ تایبه‌ت ئه‌وێن حكومه‌تا ئه‌مریكا پشته‌ڤانیێ لێ دكه‌ن وقه‌یرانا دارایى ئه‌وا ژ سالا 2014وه‌ره ب سه‌ر هه‌رێمێ دا هاتى وكارتێكرنا وێ ل سه‌ر بوارێن ژیانێ هاته كرن.
كونسلێ گشتى یێ ئه‌مریكا پیروزباهیا پارێزگه‌رێ دهۆكێ كر ل دور وه‌رگرتنا پوستێ نوو وته‌كه‌زكر كو حكومه‌تا ئه‌مریكا ئاگه‌هداره ل سه‌ر ره‌وشا هه‌رێمێ نه‌خاسمه قه‌یرانا دارایى وئابورى ودێ به‌رده‌وام هه‌ڤكار وهاریكاریێ دگه‌ل حكومه‌تا هه‌رێمێ وحكومه‌تا به‌غدا كه‌ن بو وێ یه‌كێ بگه‌هنه ل هه‌ڤتێگه‌هشتنه‌كێ بو چاره‌سه‌ركرنا هه‌موو ئاریشان.
پارێزگه‌رێ دهۆكێ خوشحالیا خو ب سه‌ره‌دانێ دیاركر وسوپاسیا حكومه‌تا ئه‌مریكا وكونسلێ گشتى یێ وى وه‌لاتى ل كوردستانێ كر ل دور ئه‌و پشته‌ڤانیا ل پرۆژێن خزمه‌تگوزارى دكه‌ن وخواست كو ئاستێ وان هاریكاریا پتر لێ بهێت.
هه‌ژى گوتنێ یه ب پشته‌ڤانیا حكومه‌تا ئه‌مریكا پشكه‌كا نه‌خوشخانا سوتنێ یا تایبه‌ت بو نه‌خوشێن كورونایێ هاتیه به‌رفره‌هكرن و(20) ته‌ختێن دن ل سه‌ر زێده‌كرینه هه‌روه‌سا بگوژمێ (4) ملیون دولارا پشته‌ڤانیا زانینگه‌ها ئه‌مریكى ل دهوكێ كریه بو پێشئێخستنا خاندنا بلند.
