ئه‌ڤرۆ سپێدێ رۆژا چارشه‌مبى 18/ 5/2022 ل ئاڤاهیێ پارێزگه‌ها دهۆكێ وب ئاماده‌بونا به‌رێزان ماجد سه‌ید صالح جێگرێ پارێزگارێ دهۆكێ بو كاروبارێن ته‌كنیكى ب وه‌كاله‌ت وجه‌هوه‌ر عه‌لى ده‌ڤه‌ردارێ دهۆكێ ود.داود ئه‌تروشى سه‌روكێ زانكویا دهۆكێ ونونه‌رێ نڤێسینگه‌ها (IT) یا ئه‌نجومه‌نێ وه‌زیران ونونه‌رێن به‌رنامێ مه‌سار ورێكخراوا VNG ونونه‌رێن 15 فه‌رمانگه‌هێن میرى یێن خزمه‌تگوزارى ئێكه‌مین سه‌نته‌رێ حكومه‌تا ئه‌لكترونى ل پارێزگه‌ها دهۆكێ (GIS)هاته ڤه‌كرن.
درێ ورسمێن ڤه‌كرنا سه‌نته‌ریدا جێگرێ پارێزگارێ دهۆكێ بناڤێ كارگێریا پارێزگه‌هێ وپارێزگارێ دهۆكێ سوپاسیا حكومه‌تا كوردستانێ وئێكه‌تیا ئه‌ورپى وبه‌رنامێ مه‌سار ورێكخراوا VNG وهه‌موو لایه‌نان كر بو پالپشتى وڤه‌كرنا سه‌نته‌رى وگوت: ڤه‌كرنا ڤى سه‌نته‌رى گرنگیا خو یا زانستى هه‌یه ودێ بیته هاریكار كو كار و پلانێن ئاڤه‌دانكرنێ بله‌ز وزانستى تر بهێنه بجهئینان وپشته‌ڤانیا پارێزگه‌هێ دیاركر بو سه‌نته‌رى.
هه‌روه‌سا به‌رپرسا رێكخراوا VNG ونونه‌رێ نڤێسینگه‌ها (IT) یا ئه‌نجومه‌نێ وه‌زیران وپرۆگرامێ مه‌سار په‌یڤێن خو خاندن وگرنگیا ڤه‌كرنا سه‌نته‌رى به‌رچاڤكرن وداخازا سه‌ركه‌فتنێ بو كاروبارێن سه‌نته‌رى دیاركرن.
پاش یاداشتا پشته‌ڤانیكرنا به‌رنامێن سه‌نته‌رى دناڤبه‌را جێگرێ پارێزگارى وپرۆگۆامێ مسار و رێكخراوا VNG ونڤێسینگه‌ها (IT) یا ئه‌نجومه‌نێ وه‌زیران هاته واژوكرن.
لدوڤدا سه‌نته‌ر بره‌نگه‌كێ فه‌رمى هاته ڤه‌كرن.
هه‌ژى گوتنێ یه سه‌نته‌رێ حكومه‌تا ئه‌لكترونى ل پارێزگه‌ها دهۆكێ (GIS) ئیكه‌مینه لسه‌ر ئاستێ هه‌رێما كوردستانێ دهێته‌ڤه‌كرن وهه‌موو داتا وپێزانین دێ دناڤ سه‌نته‌ریدا هێنه كومكرن وهه‌موو پلان وپرۆژێن خزمه‌تگوزارى ل دووڤ نه‌خشه‌یێن جوگرافى یێن سه‌نته‌رى دێ هێنه دارشتن ول ده‌ستپێكێ 15 فه‌رمانگه‌هێن خزمه‌تگوزارى تێدا دپشكدارن وپشتى هنگى دێ هێته به‌رفره‌هكرن.
