بو دوڤ چونا پرۆژێن خزمه‌تگوزارى ئه‌وێن ل سنورێ ناوچه‌داریا چه‌مانكێ سه‌ر ب ده‌ڤه‌رداریا ئامێدیێ ڤه دهێنه ئه‌نجامدان وزانینا پێدڤیێن خه‌لكێ ده‌ڤه‌رێ ئه‌ڤرو سپێدێ 11/1/2022 ب ئاماده‌بونا به‌رێزان كمال ئه‌تروشى وه‌زیرێ سامانێن سروشتى و د.على ته‌ته‌ر پارێزگارێ دهۆكێ ئو وارشین سلمان ده‌ڤه‌ردارێ ئامێدیێ وچه‌ند رێڤه‌به‌رێن میرى ونونه‌رێن كومپانیا (HKN) یا ئه‌مریكى یا ده‌رئێخستنا پترولێ ئه‌ڤ پرۆژێن ل خارێ دیاركرى هاتنه ڤه‌كرن وبه‌رێ بنیاتى بو هنده‌كێن دن هاته دانان.
1- ڤه‌كرنا پرۆژێ نوژه‌نكرن ودابینكرنا ئامێره‌تێن تاقیگه‌هان بو ئاماده‌یا چه‌مانكێ یا تێكهه‌ل كو پێك دهات ژدابینكرنا ژماره‌كا كومپیوته‌رومێزێن وان و20سپلێت وچار ئاڤ ته‌زینك وتانكێن ئاڤێ ونوژه‌نكرن وبویاغكرنا ئاڤاهیێ ئاماده‌یێ بكوژمێ پتر ژ(130) ملیار دینارا پرۆژه ب پشته‌ڤانیا كومپانیا (HKN) و وه‌زاره‌تا سامانێن سروشتى هاتیه چێكرن.
2- ڤه‌كرنا پرۆژێ رێكا سه‌ره‌كى چه‌مانكێ بو كانیك وملبركا ب درێژاهیا (26)كم بكوژمێ دوو ملیار دینارا پرۆژه ب پشته‌ڤانیا كومپانیا (HKN) وب هه‌ڤكارى دگه‌ل وه‌زاره‌تا سامانێن سروشتى هاتیه دورستكرن وپتر ژ(10) گوندا دێ مفاى ژێ وه‌رگرن.
3- دانانا به‌رێ بنیاتى بو سه‌خبێركرن وچێكرنا رێكا گوندێن چه‌م ره‌به‌تكێ – بلمه‌ندێ ب درێژاهیا (8,5)كم بكوژمێ ملیاره‌ك و(705) ملیون دینارا وخه‌لكێ هه‌شت گوندا دێ مفاى ژێ بینن پرۆژه ل سه‌ر بودجا په‌رپێدانا پارێزگه‌ها دهۆكێ دێ هێته چێكرن.
4- ڤه‌كرنا باخچه‌كێ گشتى ل سه‌نته‌رێ ناوچه‌داریا چه‌مانكێ بو خزمه‌تكرنا خه‌لكێ چه‌مانكێ پرۆژه ب پشته‌ڤانیا كومپانیا (KNH) وب هه‌ڤكارى دگه‌ل وه‌زاره‌تا سامانێن سروشتى وپارێزگه‌ها دهۆكێ بكوژمێ (120) ملیون دینارا هاتیه ئه‌نجامدان.
5- سه‌ره‌دانا سه‌نته‌رێ كومه‌لایه‌تى ل سه‌نته‌رێ ناحیا چه‌مانكێ پرۆژه ب پشته‌ڤانیا كومپانیا (HKN) وب هه‌ڤكارى دگه‌ل وه‌زاره‌تا سامانێن سروشتى وپارێزگه‌ها دهۆكێ ئاڤاهى بكوژمێ نێزیكى (250) هزار دولارا هاتیه ئه‌نجامدان .
ل دوماهیێ شاندى سه‌را ناوچه‌داریا چه‌مانكێ دا وژنێزیك هایدارى پێدڤیێن خه‌لكێ ده‌ڤه‌رێ بوون.
پاش دكونگره‌كێ رۆژنامه‌ڤانیدا وه‌زیرێ سامانێن سروشتى گوت:ئه‌ڤرو مه سه‌ره‌دانا چه‌مانكێ كر بو ڤه‌كرنا هنده‌ك پرۆژێن خزمه‌تگوزارى بو خه‌لكێ ده‌ڤه‌رێ ئه‌ڤ پرۆژه لدووڤ راسپاردێن به‌رێز مسرور بارزانى سه‌روكێ حكومه‌تا هه‌رێما كوردستانێ وب پشته‌ڤانیا هه‌ڤبه‌شێن مه ل كومپانیا (HKN) دهێنه ئه‌نجامدان بو خزمه‌تكرنا خه‌لكێ ده‌ڤه‌رێ وڤان پرۆژا چ قوتابخانه بیت یان رێك یان باخچه هه‌موو بو خه‌لكێ ده‌ڤه‌رێ زور دگرنگن وبه‌رنامێ مه دگه‌ل هه‌موو كومپانیێن دن یێن به‌رهه‌مئینانا پترولێ ئه‌وه ئه‌ڤ جوره پرۆژه بهێنه چێكرن هه‌روه‌سا ده‌لیڤێن كارى بو خوجهێن وان ده‌ڤه‌را بهێته دیتن.
پاش پارێزگارێ دهۆكێ گوت: ئه‌و پرۆژێن ئه‌ڤرو مه ڤه‌كرین وبه‌رێ بنیاتى بو داناى هنده‌ك ژوان ب هه‌ڤكاریا وه‌زاره‌تا سامانێن سروشتى وپشته‌ڤانیا كومپانیا(HKN)هاتینه دورستكرن هه‌روه‌سا هنده‌ك ژى ل سه‌ر بودجا په‌ره‌پێدانا پارێزگه‌هێ هاتینه چێكرن كوژمێ گشتى یێ بجهئینانا ڤان پرۆژان (7) ملیار و(100) ملیون دینارن ، چار ملیار ژلایێ وه‌زراه‌تا سامانێن سروشتى وكومپانیا ناڤبرى هاتینه دابینكرن وپتر ژ سێ ملیار دینارا ژلایێ حكومه‌تا هه‌رێمێ هاتینه خه‌رجكرن وكاروانێ ئاڤادانكرنێ دێ یێ به‌رده‌وامبیت.
