ب چاڤدێریا به‌رێز نێچیرڤان بارزانی سه‌روكێ حكومه‌تا هه‌رێما كوردستانێ ئه‌ڤرو سپێدێ 23-9-2017ب ئاماده‌بونا به‌رێزان فه‌رهاد ئه‌مین ئه‌تروشی پارێزگه‌رێ دهوكێ وصدقی ئامێدی بریكارێ وه‌زاره‌تا ئاڤه‌دانكرن وئاكنجیكرنێ وئوسمان یونس جێگرێ پارێزگه‌رێ دهوكێ بو كاروبارێن ته‌كنیكی وقایمقامێن قه‌زایێن زاخو وسێمێلێ وچه‌ند به‌رپرسێن فه‌رمانگه‌هێن په‌یوه‌ندیدار رێ ورسمێن دانانا به‌رێ بنیاتی بو چێكرنا رێكا دوریانا گرشین بو دوریانا سحێلا ژرێكا گشتی یا ده‌ولی دهوك براهیم خه‌لیلا زاخو هاتنه گێران.
لبه‌راهیێ ئه‌ندازیار مه‌عصوم رێڤه‌به‌رێ گشتی یێ رێك وپرا په‌یڤه‌ك خاند تێدا رونكرن دانه سه‌ر رێكا ناڤبری وگرنگیا وێ بو كاروبارێن بازرگانی وهاتن وچونا گشتی یا خه‌لكێ هه‌رێما كوردستانێ وگوت ئه‌م وه‌كو رێڤه‌به‌ریا رێك وپرا دڤی كاودانیدا باشترین دیاری پێشكێشی خه‌لكێ خویێ كوردستانێ دكه‌ین بو وێ یه‌كێ خه‌لكێ مه هاتن وچونا خو یا بله‌ز وئاسایی وبێ ئاسته‌نگی بكه‌ت.
پاش به‌رێز فه‌رهاد ئه‌مین ئه‌تروشی پارێزگه‌رێ دهوكێ په‌یڤه‌ك پێشكێشكر وگوت: ئه‌م وه‌كو حكومه‌تا هه‌رێما كوردستانێ به‌ری نوكه و نوكه‌ژی كار دكه‌ین كو رێكێن گشتی دناڤبه‌را هه‌موو باژێر وباژێركێن پارێزگه‌هێن هه‌رێما كوردستانێ دورستكه‌ین بو وێ یه‌كێ كاروبارێن بازرگانی وهاتن وچونا گشتی یا خه‌لكێ كوردستانێ بهێته خوشكرن .
هه‌روه‌سا گوت مه هه‌ولدایه رێكێن هه‌موو قه‌زایان ب سه‌نته‌رێ پارێزگه‌هێ ڤه گرێده‌ین وخوشكه‌ین تایبه‌تی رێكا (دهوك – زاخو ) كێمه‌ك مایه دێ بدوماهی هێت هه‌روه‌سا رێكێن دهوك شیخان وبه‌رده‌رش وئاكرێ كارێن به‌رده‌وام ل سه‌ر هاتینه كرن وكێم ماینه دێ ب دوماهی هێن .
و(رێكا براهیم خه‌لیلا – دهوك ) به‌ری نوكه ژی كار ل سه‌ر هاتیه كرن و ئه‌ڤرو ژی به‌رێ بنیاتی بو پارچه‌كا دی هاته دانان رێكه‌كا گرنگ و ده‌ولی یه وبزاڤه‌كا بازرگانی یا به‌رده‌وام لسه‌ر هه‌یه وئه‌و رێك ب پارێزگه‌هێن هه‌رێمێ وعیراقێ وتركیا ژی ڤه دهێته گرێدان.
پارێزگه‌رێ دهوكێ ته‌كه‌زكر كو دڤێت كومپانیا جێ به‌جێكار ل دوڤ ستانده‌رێن بو هاتینه ده‌ست نیشانكرن وێ رێكێ بجهبینیت وكاره‌كێ دورست ئه‌نجامده‌ت ول دوماهیێ سوپاسیا سه‌روكێ حكومه‌تا كوردستانێ و وزیرێ ئاڤاده‌نكرن وئاكنجیكرنێ وهه‌موو لایه‌نان كر یێن بوینه هاریكار بو بجهكرنا ڤێ رێكا ده‌ولی .
پاش ب فه‌رمی به‌رێ بنیاتی بو رێكا ناڤبری ژلایێ پارێزگه‌رێ دهوكێ وبریكارێ وه‌زاره‌تا ئاڤه‌دانكرن وئاكنجیكرنێ هاته دانان.
هه‌ژی گوتنێ یه رێكا دوریانا گرشین بو دوریانا سحێلا ژرێكا گشتی یا ده‌ولی دهوك براهیم خه‌لیلا بكوژمێ پتر ژ53ملیون و 646هزار $ دولاران دێ هێته ئه‌نجامدان پارێ رێك ژلایێ قه‌رێن سندوقا ده‌وله‌تی هاتینه دابینكرن ، رێك یا دوو سایده 20كم یا درێژه ودگه‌لدا 4ئه‌نده‌ر پاس ودوو پرێن هاتن وچونێ هه‌نه ورێك هه‌موو دێ هێته په‌ژانكرن چونكو رێكه‌كا بله‌زه دا وه‌لاتی وگیانه‌وه‌ر بهێنه پاراستن پروژه ژلایێ كومپانیا تركی (هه‌گه‌گه) دێ هێته چێكرن وبریاره دماوێ 900روژان دا بكه‌ڤیته دخزمه‌تێ دا.
