ئه‌ڤرو ئێڤارى 5/ 9/2019 ل ژێر چاڤدێریا به‌رێز مه‌سرور بارزانى سه‌روكێ حكومه‌تا هه‌رێما كوردستانێ وب ئاماده‌بونا به‌رێزان كه‌مال محمد صالح وه‌زیرێ كاره‌با حكومه‌تا هه‌رێما كوردستانێ وفه‌رهاد ئه‌مین ئه‌تروشى پارێزگه‌رێ دهوكێ وچه‌ند به‌رپرسێن ئیدارى به‌رێ بنیاتى بو پروژێ ڤه‌گوستنا هێلا كاره‌بێ یا 132كه‌ى ڤى ژخه‌بات ل سنورێ پارێزگه‌ها هه‌ولێرێ بو زه‌نگه‌نه ل سنورێ پارێزگه‌ها دهوك هاته دانان .
درێ ورسمێن دانانا به‌رێ بنیاتێ پروژه‌ى دا وه‌زیرێ كاره‌با حكومه‌تا كوردستانێ دیاركر كو پروژێ ڤه‌گوستنا هێلا كاره‌بێ یا 132كه‌ى ڤى ژخه‌بات بو زه‌نگه‌نه ودهوك زور یێ گرنگه وپشتى پروژه ب دوماهى دهێت ره‌وشا كاره‌با پارێزگه‌ها دهوكێ وه‌كو كاره‌با پارێزگه‌هێن دى یێن هه‌رێمێ دێ باش بیت.
هه‌روه‌سا گوت: دپلانا وه‌زاره‌تا كاره‌بێ دا یه چه‌ند پروژێن نوو ل سنورێ پارێزگه‌ها دهوكێ بهێنه ئه‌نجامدان وره‌وشا كاره‌بێ بهێته باشكرن.
پاش پارێزگه‌رێ دهوكێ په‌یڤه‌ك پێشكێشكر وخوشحالیا خو دیاركر هه‌مبه‌ر بجهئینانا ڤى پروژێ گرنگ بو پارێزگه‌ها دهوكێ وبڤێ هه‌لكه‌فتێ سوپاسیا سه‌روكێ حكومه‌تا كوردستانێ و وه‌زاره‌تا كاره‌بێ كر بو دورستكرنا ڤى پروژه‌ى وخواست كو سه‌روكێ حكومه‌تا كوردستانێ پتر گرنگیێ بده‌ته چاره‌سه‌ركرنا ئاریشێن كاره‌بێ ل پارێزگه‌هێ وهێله‌كا غازێ بو وێزدگه‌هێ كواشێ بهێته كێشان دا كاره‌با پارێزگه‌ها دهوكێ وه‌كو یێن پارێزگه‌هێن دى یێن كوردستانێ لێ بهێت وده‌ست خوشى ل كومپانیا جێ به‌جێكار كر وخواست كو پروژه ب كوالتیه‌كا بلند ودژڤانێ ده‌ست نیشانكریدا بهێته بجهئینان.
پاش رێڤه‌به‌رێ كومپانیا هێرو یا جێ به‌جێكار ته‌كه‌زكر كو ئه‌و دێ پروژه‌ى ل دوڤ ستانده‌رێن وه‌زاره‌تا كاره‌بێ ودژڤانێ ده‌ست نیشانكرى دا بجه ئینن وخواست كو كارگێریا قه‌زا به‌رده‌ره‌ش هاریكاریا تیمێن كومپانا وان بكه‌ن دا بو ویه‌كێ پروژه ب ئاسانى بهێته ئه‌نجامدان.
پاش به‌رهه‌ڤبویا سه‌ره‌دانا پشكه‌كا كارێ پروژه‌ى كر وژنێزیك سه‌حكرنه قوناغێن ده‌ستپێكى یێن بجهئینانێ .
هه‌ژى گوتنێ یه پروژه ل سه‌ر بودجا حكومه‌تا هه‌رێما كوردستانێ بكوژمێ (7) ملیون و(425) هزار دولاران دهێته بجه ئینان درێژیا پروژه‌ى پتره 32كم بریاره دماوێ (120) روژا ئانكو چار هه‌یڤان دا بكه‌ڤیته دخزمه‌تێ دا.
