ئه‌ڤرۆ ئێڤارى رۆژا چار شه‌مبى 27/ 7/2022 ل هوڵا كونفرانسان ل ئاكرێ ب ئاماده‌بونا به‌رێزان د.عه‌لى ته‌ته‌ر پارێزگارێ دهۆكێ وسه‌باح به‌یتوڵا به‌رپرسێ لقێ 9 ومازن محمد سعید ده‌ڤه‌ردارێ ئاكرێ وچه‌ند ره‌وشه‌نبیر وهوزانڤانێن وهونه‌رمه‌ندێن ده‌ڤه‌رێ بیرهاتنا 31سالیا دامه‌زراندنا بزاڤا ره‌وشه‌نبیرى ل ئاكرێ هاته گێران .
لبه‌راهیێ پێشانگه‌هه‌كا جورا وجور یا وێنه‌یێن سروشتى و په‌رتوكا ونمایشكرنا په‌رتوكخانا نڤیسه‌رێن ئاكرێ ئو وێنێن نڤیسه‌رێن ئاكرێ وكه‌ل وپه‌لێن فلكلورى هاته ڤه‌كرن پاش ده‌ڤه‌ردارێ ئاكرێ دپه‌یڤه‌كێدا بخێر هاتنا هه‌موو به‌رهه‌ڤبویان كر وپیروزباهیا هه‌ه‌موو ره‌وشه‌نبیر وهونه‌رمه‌ندێن ئاكرێ كر و 31سالیا دامه‌زراندنا بزاڤا ره‌وشه‌نبیرى ل ئاكرێ ل هه‌موویان پیروزكر وسه‌ركه‌فتن بو خواست.
پارێزگارێ دهۆكێ دپه‌یڤه‌كێدا پیروزباهیا هه‌موو ئه‌دیب وره‌وشه‌نبیرێن ئاكرێ وده‌روبه‌ران كر وئاماژه دا دیروكا گه‌ش و پرى سه‌روه‌رى یا ئاكرێ وگوت : گه‌له‌ك ره‌وشه‌نبیر وخه‌باتكار وناڤدار ژڤێ ده‌ڤه‌رێ په‌یدابوینه وخزمه‌تا گه‌ل ونیشتمانێ كوردستانێ كریه.
پارێزگارێ دهۆكێ ته‌كه‌زكر كو سه‌روكێ حكومه‌تا هه‌رێما كوردستانێ رێزدار مه‌سرور بارزانى ئه‌م راسپاردینه كو به‌رده‌وام پشته‌ڤانیێ ل كار وچالاكیێن ره‌وشه‌نبیرى وهونه‌رى بكه‌ین و پشته‌ڤانیا پارێزگه‌هێ نیشان دا بو ئه‌نجامدانا هه‌ر چالاكییه‌كا ره‌وشه‌نبیرى وهونه‌رى نه‌خاسمه بو چاپكرنا په‌رتوكێن وێژه‌یى ویێن گرێداى ب مێژویا كوردى و ره‌وشه‌نبیریا گشتى یا نه‌ته‌وه‌یى و ونیشتمانى وداخازا سه‌ركه‌فتنێ بو به‌رنامێن بزاڤێ كر.
پاش سترانبێژمحمد ته‌ها ئاكره‌یى سترانه‌ك پێشكێشكر لدوڤدا ماموستا عدنان رشید بابه‌ته‌ك لدور گرنگیا رۆژا چار شه‌مبى دناڤ داب ونه‌ریتێن ئاكرێ دا پێشكێشكر.
ل دوماهیێ ئه‌ڤان هه‌لبه‌ستڤانان هوزانێن خو خاندن( موئه‌ید ته‌یب – شه‌مال ئاكره‌یى – ئیسماعیل هاجانى – دلبرین هالۆ – كامیران شلى – شه‌عبان سلێمان – سه‌لام باڵایى – لاییق كورێمه‌یى – بورهان زێبارى).
بریاره سوبه‌هى ژى 28-7-2022 به‌رده‌وامى ب به‌رنامێن هه‌لكه‌فتێ بهێته دان وچه‌ند سمینار بهێنه پێشكێشكرن.
