ئه‌ڤرۆ ئێڤارى رۆژا چارشه‌مبى ٢٠٢٢⁄٩⁄٢٨ ل هولا سه‌نته‌رێ پێشمه‌رگه‌ى ب ئاماده‌بونا به‌رێزان د.عه‌لى ته‌ته‌ر پارێزگارێ دهۆكێ وچه‌ند به‌رپرسێن حزبى وئیدارى ودام وده‌زگه‌هێن راگه‌هاندنێ (59) سالیا دامه‌زراندنا ئێزگێ ده‌نگێ كوردستانا عیراقێ هاته ساخكرن .
پارێزگارێ دهۆكێ دپه‌یڤه‌كێدا ده‌ستخوشى ل سه‌نته‌رێ پێشمه‌رگه‌ى كر بو رێكخستنا ڤێ چالاكیێ وئاماژه دا رۆلێ ئێزگێ ده‌نگێ كوردستانێ كو تاكه ده‌زگه‌هێ راگه‌هاندنێ یێ كاریگه‌ربوو ژبو گه‌هاندنا چالاكیێن پێشمه‌رگه‌ى ل شوره‌شێن ئه‌یلول وگولان وسه‌هلدانێ وگوت: ئه‌و كارمه‌ندێن وى ده‌مى ل ئێزگه‌ى كاركرى هه‌موو ستێرێن كاریگه‌ربوون دناڤ شوره‌شێدا ژبو بلندكرنا ووره‌یا پێشمه‌رگه‌ى وهه‌ستا نه‌ته‌وه‌یى ونیشتمانى یا خه‌لكێ كوردستانێ وخواست هه‌موو هه‌وال وبه‌رنامێن گشتى ولێكولینێن ژئه‌رشیفێ ئێزگێ ده‌نگێ كوردستان بهێته نڤێسین ودیكیومه‌نتكرن وپاراستن وپشته‌ڤانیا پارێزگه‌هێ نیشان دا بو چاپكرنێ وان چالاكیا.
پاش جودا جودا هه‌ر ئێك ژبێژه‌رێن دێرین (تحسین دوله‌مه‌رى وصه‌باح به‌یتولا ومه‌سعود سه‌رنى) به‌حسێ كاودانێن وى ده‌مێ كرن یێ ئێزگێ ده‌نگێ كوردستانێ هاتیه دامه‌زراندن و وئاسته‌نگێن هاتینه پێش ورولێ ئێزگه‌ى بو بلندكرنا ووره‌یا پێشمه‌رگه‌ى هه‌روه‌سا بلندكرنا هه‌ستا نه‌ته‌وه‌یى ونیشتمانى یا خه‌لكێ كوردستانێ ودیاركرن كو ئێزگێ ده‌نگێ كوردستانێ تاكه ده‌زگه‌هێ باوه‌ریپێكه‌ربوو ل ناڤ وده‌رڤه‌ى كوردستانێ ژبو به‌لاڤكرنا چالاكیێن پێشمه‌رگه‌ى ل شوره‌شێن ئه‌یلول وگولان وسه‌رهلدانێ.
ل دوماهیێ پارێزگارێ دهۆكێ وحمید عه‌لى رێڤه‌به‌رێ كومه‌لگه‌ها ابراهیم خه‌لیل خه‌لاتێن رێزلێنانێ ل سه‌ر هژماره‌كا كارمه‌ندێن دێرین یێن ئێزگێ ده‌نگێ كوردستانا عیراقێ به‌ڵاڤكرن ئه‌وژى ئه‌ڤه‌بون(صه‌باح بیتولا – ته‌حسین دوله‌مه‌رى – مه‌سعود سه‌رنى – ئه‌ندازیار احمد بریفكانى- ابراهیم مسته‌فا – مه‌حفوز مایى – به‌هجه‌ت ئاڤده‌ل – بهزاد چه‌له‌بى – عبدالله چه‌له‌بى – فه‌هیم عبدالله – رشید فندى – سیفدین شنگالى).
