ئەڤرو رۆژا سێ شەمبی رێکەفتی ٢٠٢٠/١٠/٢٠ێ ب ئامادەبوونا رێزدار ” مەسرور بارزانی”سەرۆکێ حکومەتا ھەرێما کۆردستانێ و جێگر و وەزیرێن پەیوەندیدار و بەرێز “د.عەلی تەتەر” پارێزگارێ دھۆکێ، پرۆژێ رێکا نێڤدەولەتی یا ٢٢ کیلۆمەتری دناڤبەرا رۆڤیا-گۆپال ب کۆژمێ ٨٤ ملیۆن دۆلاران ھاتە ڤەکرن.
بەرێز “د.عەلی تەتەر” پارێزگارێ دھۆکێ دپەیڤا خۆ یا بخێرھاتنێ دا سوپاسیا رێزدار “مەسرور بارزانی” سەرۆکێ حکومەتا ھەرێما کوردستانێ كر، ژ بۆ گرنگیدانا جەنابێ وان ب پرۆژێن ستراتیژی ل پارێزگەھا دھۆکێ، و دەست خۆشی ل رێڤەبەریا رێک و پرا ژ بۆ سەرپەرشتیا پرۆژەی و گرۆپێ کۆمپانیا کاڤین کر کو گەلەک کێمتر ژ دەمێ دەست نیشانکری ئەڤ پرۆژە ئەنجام دایە، و راگەھاند پرۆژە ب کۆالێتیەکا باش ھاتیە دروستکرن و دێ کار ئاسانیێ بۆ ھەمی بواران کەت.
پاشی کۆمپانیا جێ بەجێ کار و وەزیرێ ئاڤەدانکرنێ یێ حکومەتا ھەرێما کۆردستانێ پەیڤێن خۆ پێشکێش کرن.
رێزدار “مەسرور بارزانی” د پەیڤا خۆ دا راگەھاند: ئەوا جھێ خۆشحالیێ یە ئەو پرۆژێن د نوکە دا ھەمی ژ لایێ کۆمپانیێن ناڤخۆیی ڤە دھێنە جێ بەجێ کرن، و ھەروەسا سەرۆکێ حکومەتا ھەرێما کۆردستانی گۆت: ئەڤ پرۆژێن ستراتیژی گەلەک دگرنگن بۆ خزمەتکرنا وەلاتیان ب تایبەتی دروستکرنا رێک و پرا وەکی پرۆژەکێ ستراتیژی بۆ پەرەپێدانا ئابووری یا کوردستانێ کو بەرنامێ کابینا نەھێ یا حکومەتا ھەرێما کۆردستانێ یە گرنگیا زێدەتر ب پرۆژێن خزمەتگۆزاری و پێشئێخستنا ژێرخانا ئابووری بدەت.
ژ ھەژی گۆتنێ یە، ئەڤ پرۆژە ب کۆژمێ ٨٤ ملیۆن دۆلاران ب درێژاھیا ٢٢ کیلۆمەتران وەکو رێکا سەرەکی و نێڤدەولەتێ دناڤبەرا دھۆک- ھەولێر دا ھاتە ڤەکرن.
