ئەڤرۆ روژا دووشەمبی رێکەفتی ٢٠-٦-٢٠٢٢ لژنەیەک بۆ بەرهنگاریا کۆلێرایێ ب سەرۆکاتیا بەرێز (شەمعوون شلیموون ئیشو) جێگرێ پارێزگارێ دهۆکێ و بەرێز جەهوەر علی، دەڤەردارێ پارێزگەها دهوکێ و ب پشکداریا 11 نوینەرێن فەرمانگەهێن پەیوەندیدار یێن پارێزگەها دهۆکێ کو نوینەرێن ژینگەهـ، پۆلیس، ساخلەمی و ڤێتێرنەری و ئاسایش و چەندین فەرمانگەهێن دی کومبونا لژنا بەرهنگاریا کولێرایێ ئەنجام دا.
لدەستپێکێ رێڤەبەرێ گشتیێ ساخلەمیا پارێزگەها دهوکێ، بەحس ل مەترسی یێن نەخوشیا کولێرایێ کر و ئەو رێکارێن پێتڤی ژبو گەشەنەکرن و کونترولکرنا ڤێ پەتایێ دانە دیارکرن، پاشان هەر رێڤەبەریەکێ ب هویری ب شێوەکێ گشتی بەحس ل چەوانیا رێکارێن ب وانڤە گرێدایی بو خوپاراستنێ ژ نەخوشیا کولێرایێ هاتنە کرن و چەندین رێنمایی تێدا هاتنە دیارکرن ژ بو بەرهنگاریا نەخوشیا کولێرایێ.
ژ وان بریارێن هاتینەدان کو بۆ دەما 20 رۆژان کەسکاتی ژ خوارنگەهێن پارێزگەها دهۆکێ بهێتە قەدەغەکرن، سوبەهی دێ هەمی رێنمایی و بریار بو دەزگەهێن راگەهاندنێ و لایەنێن پەیوەندیدار هێنە دیارکرن.
ئەو بریارو رێنمایی یێن سوبەهی رۆژا سێشەمبی 21-6-2022 دەر دچن، هەر هەمان روژدا دێ چنە د وارێ بجهئینانێ دا.
پێنج تا شەش حالەتێن گۆمانلێکری یێن کۆلێرایێ ل پارێزگەها دهۆکێ هەبوون، لێ پشکنینێن وان نەگەتیڤ دەرکەفتینە و تا ئەڤرۆ چ حالەتێن کۆلێرایێ ل پارێزگەها دهۆکێ نەهاتینە تۆمارکرن.
لژنەیا بەرهنگاریا کۆلێرایێ حەفتیانە دێ کۆم بیت و ل سەر بجهئینانا بریاران وپێشهاتێن نوی دێ چاڤدێر بیت.
