بو دووڤ چونا پرۆژێن خزمه‌تگوزارى ئه‌وێن ل سنورێ ناوچه‌داریا فه‌یدیێ ل ده‌ڤه‌رداریا سێمێلێ دهێنه ئه‌نجامدان ئه‌ڤرو سپێدێ 7/9/ 2021 به‌رێز د.على ته‌ته‌ر پارێزگارێ دهوكێ ب یاوه‌ریا چه‌ند رێڤه‌به‌رێن فه‌رمانگه‌هێن په‌یوه‌ندیدار سه‌را رێڤه‌به‌ریا ناوچه‌داریا فه‌یدیێ دا ژلایێ خه‌لیل محمود ده‌ڤه‌ردارێ سێمێلێ و عادل ئه‌مین رێڤه‌به‌رێ ناوچه‌داریا فه‌یدیێ وچه‌ند به‌رپرسێن حزبى وئیدارى پێشوازى لێ هاته كرن.
درونشتنه‌كێدا به‌حسێ پێدڤیێن خه‌لكێ ده‌ڤه‌رێ ب پرۆژێن خزمه‌تگوزارى ب گشتى هاته كرن.
پاش پارێزگارێ دهۆكێ ب ئاماده‌بوونا سیروان روژبه‌یانى جێگرێ پارێزگارێ نه‌ینه‌وا ئه‌ڤ پرۆژه ڤه‌كرن وبه‌رێ بنیاتى بو هنده‌كێن دن دانا :-
1-ڤه‌كرنا چه‌ند جادێن نافخویى ل ناڤ سه‌نته‌رێ كومه‌لگه‌ها دومیز وناوچه‌داریا فه‌یدیێ ب درێژاهیا (6,5) كم .
2- ڤه‌كرنا ئاڤاهیێ سه‌روكاتیا باژێرڤانیا فه‌یدیێ و قوتابخانه‌كا 12رێزى وباخچه‌كێ زاروكان وئاڤاهیێ هوبا چاندنێ ل سه‌نته‌رێ ناوچه‌داریا فه‌یدیێ.
3- ڤه‌كرنا چه‌ند جادێن خزمه‌تگوزارى ل ناڤ سه‌نته‌رێ ناوچه‌داریا فه‌یدیێ.
4-دانانا به‌رێ بنیاتى بو چێكرنا یاریگه‌هه‌كا وه‌رزشى ل كومه‌لگه‌ها شاریا بكوژمێ(120) ملیون دینارا كو ژلایێ ئێكه‌تیا لاوێن دیموكراتا كوردستانێ ڤه دێ هێته ئه‌نجامدان.
5-دانانا به‌رێ بنیاتى بو قێركرنا رێكێن نافخویى وچێكرنا سولینه‌كا ئاڤ رێژ ل سه‌نته‌رێ كومه‌لگه‌ها شاریا بكوژمێ(374) ملیون دینارا.
پاش پارێزگارێ دهۆكێ وجێگرێ پارێزگارێ نه‌ینه‌وا ویێن دگه‌لدا سه‌را ناوچه داریا ئه‌لقوش دا ژلایێ خانم لارا یوسف رێڤه‌به‌را ناوچه‌داریێ وچه‌ند رێڤه‌به‌رێن فه‌رمانگه‌هێن ده‌ڤه‌رێ پێشوازى لێ هاته كرن.
لدووڤدا و درێ ورسمه‌كێ تایبه‌ت دا ب ئاماده‌بونا رێڤه‌به‌رێ گشتى یێ ره‌گه‌زنامێ ل پارێزگه‌ها نه‌ینه‌وا وچه‌ند به‌رپرسێن ئێمناهیا ده‌ڤه‌رێ فه‌رمانگه‌ها كارتا نیشتمانى ل ئه‌لقوش هاته ڤه‌كرن.
ل دوماهیێ یاریگه‌هه‌كا بچیكرى یاپێنچ یاریزانى ل سه‌نته‌رێ ناوچه‌داریا ئه‌لقوش هاته ڤه‌كرن.
دداخویانییه‌كێدا پارێزگارێ دهۆكێ گوت:ئه‌ڤرو ب هه‌ماهه‌نگى دگه‌ل پارێزگه‌ها نه‌ینه‌وا مه هژماره‌كا پرۆژێن خزمه‌تگوزارى وه‌كو جادێن نافخویى ورێكه‌كا گرنگ ژجادا دوو سایدیى ل فه‌یدیێ وپرۆژێن په‌روه‌ردێ وچاندنێ وه‌رزشى وهتد…مه ڤه‌كرن وبه‌رێ بنیاتى بو هنده‌كێن دن دانا ئه‌و پرۆژێن لسنورێ ناوچه‌داریا فه‌یدیێ هاتینه ڤه‌كرن وبه‌رێ بنیاتى بو هاتیه دانان بهایێ وان پتربوو ژ(8,5) ملیار دینارا هه‌روه‌سا به‌رى نوكه ژى چه‌ند پرۆژه ل ده‌ڤه‌رێ هاتینه ئه‌نجامدان تایبه‌ت پرۆژێ ئاڤا فه‌یدیێ یێ ستراتیجى كو ب كوژمێ پترژ 33ملیون دولارا هاتیه بجهئینان.
هه‌روه‌سا مه سه‌ره‌دانا ناوچه‌داریا ئه‌لقوش ژى كر، لوێرێ ژى فه‌رمانگه‌ها ده‌رئێخستنا كارتا نیشتمانى هاته ڤه‌كرن دگه‌ل ڤه‌كرنا یاریگه‌هه‌كا وه‌رزشى بره‌نگه‌كێ گشتى مه هه‌ڤكاریه‌كا باش دگه‌ل پارێزگه‌ها نه‌ینه‌وا هه‌یه بو گه‌هاندنا پرۆژێن خزمه‌تگوزارى بو خه‌لكێ مه ل ده‌ڤه‌رێن مادا سه‌د وچل.
