ئه‌ڤرۆ سپێدێ 26/7/2020 به‌رێز د.على ته‌ته‌ر پارێزگه‌رێ دهۆكێ سه‌را هوڵا محمد عارف جزیرى دا ژلایێ به‌رێز ئه‌یوب ره‌مه‌زان رێڤه‌به‌رێ گشتى یێ ره‌وشه‌نبیرى وهونه‌رى پێشوازى لێ هاته كرن.
پارێزگه‌رێ دهۆكێ گه‌ریانه‌ك ل ناڤ هوڵا ناڤبرى كر وژنێزیك سه‌حكره وان زیانێن گه‌هشتینه هوڵَێ.
ل دور نووژه‌نكرنا هوڵێ پارێزگه‌رێ دهۆكێ بو ده‌زگه‌هێن راگه‌هاندنێ ئاخفت وگوت: ئه‌ڤرو مه سه‌ره‌دانا هوڵا محمد عارف جزیرى كر كو ئێكه ژكه‌ڤنترین هوڵا ل سه‌نته‌رێ پارێزگه‌هێ ومه هه‌میا گه‌له‌ك بیره‌وه‌رى ل ڤى جهى هه‌نه گه‌له‌ك ئاهه‌نگ وچاڵاكیێن ره‌وشه‌نبیرى وهونه‌رى وكلتورى وكونسێرت وشانوگه‌رى وگوتارێن سیاسى لێ هاتینه گێران وئه‌ڤ هوڵه یابویه پشكه‌ك ژبیردانكا خه‌لكێ دهۆكێ وب مخابنیڤه ل سالا2013ێ هاتیه سوتن ول دووڤ نڤێسینا رێڤه‌به‌ریا گشتى یا ره‌وشه‌نبیرى وهونه‌رى به‌رێز مه‌سرور بارزانى سه‌روكێ حكومه‌تا هه‌رێما كوردستانێ رازیبونا خو دیاركریه كو هوڵ بهێته نووژه‌نكرن وئه‌ڤرۆ ئه‌م هاتینه كو نووژه‌نكرنا وێ رابگه‌هینین كو ب ستایله‌كێ نوو بهێته چێكرن وبكه‌ڤیته دخزمه‌تا بزاڤا ره‌وشه‌نبیرى وهونه‌رمه‌ندى دا.
پارێزگه‌رێ دهوكێ پیروزباهیا خه‌لكێ پارێزگه‌هێ كر وخواست كو پشتى دهێته نووژه‌نكرن وه‌كو جاران هه‌موو چاڵاكیێن ره‌وشه‌نبیرى وهونه‌رى لێ بهێنه گێران.
پاش رێڤه‌به‌رێ گشتى یێ ره‌وشه‌نبیرى وهونه‌رى دپه‌یڤه‌كێدا سوپاسیا به‌رێز مه‌سرور بارزانى سه‌روكێ حكومه‌تا كوردستانێ كر كوئه‌ركێ نووژه‌نكرنا هوڵێ ب ستویێ خوڤه گرتیه هه‌روه‌سا سوپاسیا پارێزگه‌رێ به‌رێ وپارێزگه‌رێ نوو یێ دهوكێ كر كو گه‌له‌ك هه‌ولدان كرینه هه‌تا هوڵ بهێته نووژه‌نكرن وته‌كه‌زكر كو پشتى هوڵ دهێته نووژه‌نكرن دێ خزمه‌ته‌كا باش كه‌ت تایبه‌ت بو چاڵاكیێن ڤسیتیڤاڵێن سینه‌مایێ.
رێڤه‌به‌رێ گشتى یێ ره‌وشه‌نبیرى وهونه‌رى پیروزباهیا هه‌موو ره‌وشه‌نبیر وهونه‌رمه‌ندان وخه‌لكێ پارێزگه‌هێ كر وداخاز ژكابینا نوو یا حكومه‌تا كوردستانێ وپارێزگه‌رێ دهۆكێ كر كو گرنگیێ بده‌نه ژێر خانا ره‌وشه‌نبیرى تایبه‌ت ئاڤاكرنا هوڵا ل سه‌نته‌رێ دهوكێ وهه‌موو قه‌زایێن پارێزگه‌هێ .
