ئه‌ڤرو ئێڤارى 24/ 10/2019 ب چاڤدێریا به‌رێز فه‌رهاد ئه‌مین ئه‌تروشى پارێزگه‌رێ دهوكێ وب ئاماده‌بونا ئه‌ندازیا احسان یه‌حییا سه‌روكێ باژێرڤانیا دهوكێ پروژێ ڤه‌كرن وقێركرنا جادا كه‌مه‌رى ل تاخێ نزاركێ ل باژێرێ دهوكێ هاته ڤه‌كرن.
درێ ورسمێن ڤه‌كرنا پروژه‌ى دا پارێزگه‌رێ دهوكێ خوشحالیا خو ب ڤه‌كرنا ڤێ پشكا گرنگ یا جادا كه‌مه‌رى ل باژێرێ دهوكێ دیاركر وده‌ست خوشى ل كومپانیا كاڤین یا جێبه‌جێكار وتیمێ ئه‌ندازیارى یێ سه‌روكاتیا باژێرڤانیا دهوكێ كر كو پروژه ب رێك وپێكى وب كوالیتیه‌كا باش ودماوه‌كێ كورت دا بجه ئینایه ورێك كه‌تیه دخزمه‌تا خه‌لكێ باژێرێ دهوكێ دا .
هه‌روه‌سا گوت: ئه‌ڤ پروژه پشكه‌كه ژپروژێ سێ ئه‌نده‌ر پاسێن دكه‌ڤه‌نه سه‌ر جادا بارزان ل ناڤ سه‌نته‌رێ دهوكێ دگه‌ل جادا خزمه‌تكارى وب چێكرنا ڤێ پشكا جادا كه‌مه‌رى دێ هاتن وچونا وه‌لاتیان ئاسانتر لێ هێت وتیمێن كومپانیا جێبه‌جێكارى ژى دێ ب ساناهیتر كارێ خو ئه‌نجامده‌ن.
ل دوماهیێ پارێزگه‌رێ دهوكێ ته‌كه‌زكر كو ئه‌م وه‌كو حكومه‌تا هه‌ریما كوردستانێ و كارگێریا پارێزگه‌هێ وسه‌روكاتیا باژێرڤانیا دهوكێ دێ به‌رده‌وام دوڤ چونا پروژه‌ى كه‌ین كو ب ره‌نگه‌كێ رێك وپێك وب كوالیتیه‌كا باش ول ده‌مێ ده‌ست نیشانكرى بهێته چێكرن بو وێ یه‌كێ كو خه‌لكێ پارێزگه‌ها دهوكێ وپارێزگه‌هێن دى یێن كوردستانێ پتر مفاى ژێ ببینن وپیروزباهیا خه‌لكێ پارێزگه‌هێ ژى كر كو پشكه‌كا گرنگ یا پروژێ ئه‌نده‌رپاسا كه‌ته دخزمه‌تێ دا.
هه‌ژى گوتنێ یه درێژیا جادا هاتیه ڤه‌كرن (1500)مترن ، جاده دوو سایده كوژمێ 2ملیار و600ملیون دینارا بو هاتینه ته‌رخانكرن پروژه دماوێ دوو هه‌یڤا ونیڤا دا هاتیه ئه‌نجامدان، پروژێ ناڤبرى پشكه‌كه ژپروژێ چێكرنا سێ ئه‌نده‌ر پاسا ودگه‌ل جادا خزمه‌تكارى ل سه‌ر جادا بارزان ل ناڤ سه‌نته‌رێ باژێرێ دهوكێ كوژمێ گشتى یێ پروژه‌ى 73ملیار دینارن بریاره دماوێ 960روژان دا ب دوماهى بهێت.
