ئه‌ڤرو سپێدێ 24-4- 2020 ل كوچكا پارێزگه‌هێ دكونگره‌كێ روژنامه‌ڤانیدا به‌رێز ماجد سه‌ید صالح جێگرێ پارێزگه‌رێ دهوكێ ب وه‌كاله‌ت قوناغا 7 ژبه‌رنامێ ژورا ئوپه‌راسیونا یا پارێزگه‌ها دهوكێ یا به‌رهنگاریا ڤایروسێ كورونا بو ئاسایكرنا ژیانا وه‌لاتیان راگه‌هاند ولبه‌راهیێ ب هه‌لكه‌فتا هاتنا هه‌یڤا ره‌مه‌زانێ پیروزباهیا هه‌موو موسلمانێن پارێزگه‌هێ ویێن كوردستانێ وجیهانێ كر وخواست خودێ ڤێ هه‌یڤێ بكه‌ته هه‌یڤا خێر وخوشى وبه‌ره‌كه‌تێ ونه‌مانا ڤایروسێ كورونا.
هه‌روه‌سا جێگرێ پارێزگه‌رێ دهوكێ ب وه‌كاله‌ت گوت: ئه‌ڤرو مه ب فه‌ردیت قوناغا 7 بو ئاسایكرنا ژیانێ ل پارێزگه‌هێ رابگه‌هینین و چه‌ند جهێن پیشه‌یى وكاسبكاریێ ڤه‌كه‌ین وئه‌م داخازێ ژهه‌موو هاولاتیان دكه‌ین وه‌كو پیشه‌كار وكاسبكار وهاولاتیێن ئاسایى هه‌موو ب هه‌ڤرا پێگریێ ب رێنما وبریارێن ته‌ندورستى بكه‌ن وخو ب پارێزن ده‌ما سه‌ره‌دانا دوكانا وبازاران دكه‌ن چونكو هێشتا مه‌ترسیا ڤایروسێ كورونا بدوماهى نه‌هاتیه وبه‌لگه‌ژى ئه‌وه كو دوهى ژى حاله‌ته‌كێ ڤایروسێ كورونا ل دهوكێ په‌یدابویه.
ئه‌و جهێن دێ هێنه ڤه‌كرن ئه‌ڤه‌نه:-
ڤه‌كرنا جهێن فروتنا جل وبه‌رگ وپێلاڤێن زه‌لام وئافره‌ت وزاروكا وپه‌روكا وكه‌لو وپه‌ل ویاریێن زاروكا وجوانكارى وئێكسوارات وپێدڤیێن ناڤ مالێ ژدوشه‌ك وبه‌ته‌نى وئامان ب هه‌موو ره‌نگا وجهێن فروتنا جگارا وبوهاراتا ژ سه‌عه‌ت 9 سپێدێ هه‌تا 6 ئێڤارى.
ڤه‌كرنا دورینگه‌هێن زه‌لام وئافره‌تان ژ سه‌عه‌ت 9 سپێدێ هه‌تا 6 ئێڤارى.
ڤه‌كرنا بازارێن زێرنگریێ ل روژێن شه‌مبى ودووشه‌مب وچاره‌شه‌مبیا ژ سه‌عه‌ت 9 سپێدێ هه‌تا 6 ئێڤارى.
ڤه‌كرنا نڤێسینگه‌هێن كرین وفروتنا عه‌در وخانیا ل روژێن ئێك شه‌مب وسێ شه‌مب وپێنچ شه‌مب ژ سه‌عه‌ت 9 سپێدێ هه‌تا 6 ئێڤارى.
ڤه‌كرنا نڤێسینگه‌هێن فروتنا كه‌ره‌ستێن ئاڤاهیا وبویاغكرنێ ومه‌یدانكێن كرێكارا ژ سه‌عه‌ت 6 سپێدێ هه‌تا 3 ئێڤارى.
ڤه‌كرنا نڤێسینگه‌هێن كومپیوته‌رى وریكلام وتومارگه‌ه وێنه‌گریا ژ سه‌عه‌ت 8 سپێدێ هه‌تا 4 ئێڤارى.
ڤه‌كرنا پێشانگه‌هێن ترومبێلا ل روژێن ئێك شه‌مب وسێ شه‌مب وپێنچ شه‌مب ژ سه‌عه‌ت 10 سپێدێ هه‌تا 5 ئێڤارى.
ڤه‌كرنا جهێن جوانكاریا ترومبێلا ژ سه‌عه‌ت 8 سپێدێ هه‌تا 5 ئێڤارى.
ڤه‌كرنا جهێن فروتنا قه‌نه‌فه ومه‌حفیر وكومبار وپه‌ردا وجهێن شویتنا وان ژ سه‌عه‌ت 9 سپێدێ هه‌تا 5 ئێڤارى.
ڤه‌كرنا سه‌مونخانه وناپێژیا ل ده‌مێ پاشیڤێ زێده‌بارى ده‌مێن رپێداى ژ12شه‌ڤێ هه‌تا 4 سپێدێ.
ڤه‌كرنا جهێن شوشتنا ترومبێلا ژ سه‌عه‌ت 10 سپێدێ هه‌تا 4 ئێڤارى.
هاتن وچونا ته‌كسیا ب سیسته‌مێ كت وجوت بیت ودڤێت هه‌ر ته‌كسیه‌كێ ژدوو كه‌سا دگه‌ل شوفێرى تێدا نه‌بن وهه‌موو رێنمایا ب كاربینن ژ سه‌عه‌ت 12 شه‌ڤێ هه‌تا 6 ئێڤارى.
ڤه‌كرنا كلینیكێن نوشدارا ونوشدارێن ددانا وكلینیكێن كارمه‌ندێن ساخله‌میێ تاقیگه‌ه وتیشك وسونه‌ر ب شێوه‌كێ ئاره‌زومه‌ندانه بیت ژده‌م ژمێر 2 نیڤرو هه‌تا 6 ئێڤارى وهه‌موو ژڤان ب تێله‌فونێ دێ هێنه وه‌گرتن وته‌نها ئێك نه‌خوش دێ دكلینیكێ ڤه‌بیت وزێده‌تر ژ دوو نه‌خوشان دژورا چاڤه‌رێكرنێ دا نه‌بیت و2 مترا ژئێك دوو دوربن وهه‌موو پێدڤیێن تافیلكرنێ بهێنه دانان ل هولا بێهنڤه‌دانێ وژورا نوشدارى ول دوماهیا كارى هه‌موو كلینیك بهێنه تافیلكرن ونوشدار ده‌ستگورك وكه‌ماما ب كاربینیت وروژانه بتنێ 15 نه‌خوشا چاره‌سه‌ركه‌ت وپێزانینا ل توماره‌كێ توماركه‌ت.
هه‌روه‌سا گوت: نوشدارێن دفن وگه‌ریێ وگوها وكادرێ چاڤدێریا چر دڤێت ماسكێن(N-95)ب كاربینن ونوشدارێن ددانا ماسكێت (95N-) وفیس شیلد ب كاربینن ول نه‌خوشخانێن تایبه‌ت بتنێ نشته‌رگه‌ریێن بله‌ز وهه‌وارهاتنێ ئه‌نجامده‌ن وبهایێ 25% بهێته كێمكرن..
جێگرێ پارێزگه‌رێ دهوكێ ب وه‌كاله‌ت ته‌كه‌زكر كو لیژنێن هه‌ڤپشك به‌رده‌وام دێ دووڤ چونا بجهئینانا رێنمایا كه‌ن وهه‌موو هاولاتى وكاسبكار ل جهێن كارى دڤێت ده‌مامك وده‌ستگوركا ب كاربینن وژدوو كه‌سا پتر ل جهه‌كى كومڤه‌نه‌بن ومیتره‌كێ هه‌تا ئێك ونیڤا ژهه‌ڤدوو دوربن وتافیلكه‌رێن شل ب كاربینن ده‌مێ سه‌ره‌ده‌ریێ دگه‌ل كه‌سانێن دن دكه‌ن.
