ئه‌ڤرو پشتى نیڤرو 1/7/2020 به‌رێز ماجد سه‌ید صالح جێگرێ پارێزگه‌رێ دهوكێ ب وه‌كاله‌ت وب ئاماده‌بونا به‌رێز د.نزار عسمت رێڤه‌به‌رێ گشتى یێ ساخله‌میێ ل پارێزگه‌هێ كونگره‌كێ روژنامه‌ڤانى ل دور نوترین پێشهاتێن نه‌خوشیا ڤایروسێ كورونا ئه‌نجامدا.
جێگرێ پارێزگه‌رێ دهوكێ ب وه‌كاله‌ت گوت: ل روژێن ده‌ربازبوى مه دوو كومبون ل دور هه‌لسه‌نگاندنا بجه ئینانا بریار ورێنمایێن تایبه‌ت ل دور په‌تایا كورونا ئه‌نجامداینه ، یا دیاره ل جهێن دى ل هه‌رێما كوردستانێ ڤایروسێ كورونا ته‌شه‌نه كریه له‌ورا ل وان ده‌ڤه‌را ژى پێرابون توندترلێكرینه و ل سه‌ر ئاستێ پارێزگه‌ها دهوكێ ره‌وش باشتره ودڤێت ئه‌م به‌رده‌وامبین ل سه‌ر بجه ئینانا بریار ورێنمایێن ژورا ئوپه‌راسیونا هه‌روه‌سا هاولاتى ژى پتر پێگیربن دا ره‌وشا گشتى یا ساخله‌میێ باشتر بهێته پاراستن وپه‌تایا كورونا پتر بهێته كونترولكرن .
جێگر پارێزگه‌رێ دهوكێ ب وه‌كاله‌ت ته‌كه‌زكر كوهه‌موو لایه‌ن وه‌كو ئێك تیم كار وخزمه‌تێ بكه‌ن وهه‌موو رێنما ورێكارێن وه‌زاره‌تا ساخله‌میێ ونافخویى بجه بینن و وهاولاتى خو ژمیهڤانداریێن ب كوم وبه‌هى وشاهیان و قه‌ره‌بالغێ دوركه‌ن دا ساخله‌میا وان بهێته پاراستن.
هه‌روه‌سا دیاركر كو ژورا ئوپه‌راسیونا هاتن وچون ل زالگه‌ها پتر توندكرینه ل هه‌مبه‌ر هاتن وچونا گشتى وژبلى وان حاله‌تێن رێ پێهاتیه دان هه‌روه‌سا ته‌كه‌زكر كو لیژێن تایبه‌ت ل قایمقامیا وناحیا دێ هه‌وێن نوو ئه‌نجامده‌ن بو دویڤ چونا بجه ئینانا رێنمایان وخواست كو هه‌موو لایه‌ن و هاولاتى دهاریكاریبن بوبجه ئینانا رێنمایان.
پاش رێڤه‌به‌رێ گشتى یێ ساخله‌میێ گوت: مه‌هه‌مویان ب هه‌ڤرا كاركریه وخه‌لكێ مه‌ژى زور دهاریكاربوینه دگه‌ل تیمێن مه وژبه‌ر وێ پێگریا دهێته كرن ژمارا توشبویا ل پارێزگه‌هێ كێمتره ژجهێن دى .
هه‌روه‌سا گوت: تیمێن مه زوو نه‌ساخ و به‌ركه‌فتیێن ڤایروسێ كورونا ده‌ست نیشان دكه‌ن وچاره‌سه‌ریا نه‌ساخا ژى زو دكه‌ین له‌ورا ره‌وشا مه باشتره ژجهێن دى وخواست كو خه‌لك وسازیێن دن پتر هه‌ڤكاربن دگه‌ل تیمێن ساخله‌میێ دا ڤایروسێ كورونا باشتر بهێته كونترولكرن.
رێڤه‌به‌رێ گشتى یێ ساخله‌میێ ته‌كه‌زكر كو كه‌ره‌نتیكرنا خه‌لكى ژده‌رڤه بو پارێزگه‌هێ یا به‌رده‌وامه وهه‌تا نوكه 8316 كه‌س هاتینه كه‌ره‌نتیكرن و177 كه‌س توشى كورونایێ بوینه وروژانه (500_600) بشكنین دهێنه كرن ب گشتى ره‌وشا ڤایروسێ كورونا ل پارێزگه‌هێ یا جێگیره .
