ئه‌ڤرو پشتی نیڤرو 7-7-2015به‌رێز (ده‌رباز محمد ) وه‌زیرێ كوچ وكوچبه‌ران یێ حكومه‌تا ئییراقا فیدرال وشاندێ دگه‌لدا سه‌را كوچكا پارێزگه‌ها دهوك دا ژلایێ به‌رێزان به‌هزاد علی ئاده‌م جێگرێ پارێزگه‌ری واسماعیل محمد احمد هاریكارێ پارێزگه‌ری بو كاروبارێن ئاواره وپه‌ناهندا پێشوازی لێ هاته كرن.
دهه‌ڤدیتنه‌كێدا به‌حسێ ره‌وشا ئاواره وپه‌ناهندا ل سنورێ پارێزگه‌هێ وئه‌و كار وخزمه‌تا بو دهێته پێشكێشكرن وكێم وكاسیێن ل ناڤ وده‌رڤه‌ی كه‌مپا ب گشتی هاته كرن.. .
لدور سه‌ره‌دانێ وه‌زیرێ كوچ وكوچبه‌ران یێ حكومه‌تا ئیراقا فیدرال بو سازیێن راگه‌هاندنێ گوت.. . ئه‌ڤ سه‌ره‌دانه دچارچوڤێ وان سه‌ره‌دانێن به‌رده‌وام دایه كو ئه‌م ئه‌نجامده‌ین بو دوڤ چونا ره‌وشا ئاواران ل سه‌رنسه‌ری ئیراقێ وسه‌ره‌دانا مه بو پارێزگه‌ها دهوكێ بو دوڤ چونا بابه‌تێن گرنگ یێن گرێدای ب ره‌وشا ئاواراڤه‌یه ژوانا.
چاككرن وباشكرنا خزمه‌تكاریا لناڤ كه‌مپان وه‌كو ئاڤ وكاره‌ب ورێك وئاڤاكرنا قوتابخانان وبنگه‌هێن ته‌ندورستی ئه‌ڤه ب هه‌ڤكاری دگه‌ل پارێزگه‌ها دهوكێ دێ هێنه ئه‌نجامدان ومه داخاز ژ102كومپانیا كریه كو ڤه‌دیتنا پروژێن ناڤ كه‌مپا پێشكێشكه‌ن و12ملیار دینار بو وان پروژا هاتینه ته‌رخانكرن وپشتی جه‌ژنێ دێ ده‌ست بجهكرنا وان هێته كرن. 
مه دڤیا سه‌رپه‌رشتیا به‌لافكرنا وان هاریكاریا بكه‌ین ئه‌وێن مه بو پارێزگه‌ها دهوكێ هنارتین وه‌كو كه‌ل وپه‌لێن خارنێ وپێدڤیێن هاڤینێ هه‌روه‌سا دا ژنێزیك پێدڤیێن دن یێن ئاوارا بزانین.
دوڤ چونا ده‌رئێخستنا كارتا زیره‌ك دا بشیێن هاریكاریا ئێك ملیون دیناری ل سه‌ر ئاوارا به‌لافكه‌ین چونكو 488هزار خێزان ل ده‌ف مه دتوماركرینه وهه‌تا نوكه 330هزار خێزانا ئه‌و هاریكاری وه‌رگرتیه كو دبنه (330) ملیار دیناروئه‌وێن دهێنه توماركرن ئه‌وژی دێ وێ هاریكاریێ وه‌رگرن..
ژلایێ خوڤه هاریكارێ پارێزگه‌رێ دهوكێ بو كاروبارێن ئاواره‌یان خوشحالیا خو ب سه‌ره‌دانێ دیاركر وخواست كو ئه‌ڤ جوره سه‌ره‌دانا به‌رده‌وام بو پارێزگه‌هێ بهێنه ئه‌نجامدان چونكو ژماره‌كا زور یا ئاواره‌یان ل پارێزگه‌هێ هه‌نه ولناڤ پتر ژ20 كه‌مپا هاتینه ئاكنجیكرن ورونشتڤانێن وان كه‌مپا پێدڤیا ب هاریكاریا هه‌ی.
