ئه‌ڤرۆ ئێڤارى 29-7-2020 به‌رێز ماجد سه‌ید صالح جێگرێ پارێزگه‌رێ دهۆكێ ب وه‌كاله‌ت سه‌رپه‌رشتیا كۆمبوونا لیژنا رێكخستنا خزمه‌تگوزاریێن لناڤ پرۆژێن ئاكنجیبونێ یێن كه‌رتێ تایبه‌ت وتاپوكرنا یه‌كێن وان پرۆژا بۆ هاولاتیان كر.
دكۆمبوونێدا گه‌نگه‌شه ل سه‌ر چاوانیا رێكخستن و پێشكێشكرنا ئاستێ وان خزمه‌تگوزاریان وكێمكرنا بهایێ وان ل ناڤ پرۆژێن یه‌كێن ئانجیبونێ یێن كه‌رتێ تایبه‌ت وجهێن دى ب گشتى هاته كرن.
پاش دكۆنگره‌كێ رۆژنامه‌ڤانیدا كوردۆ احسان رێڤه‌به‌رێ گشتى یێ وه‌به‌رهێنانێ ل پارێزگه‌هێ ئه‌ندامێ لیژنا ناڤبرى گۆت: ل دوڤ راسپاردێن ئه‌نجۆمه‌نێ وه‌زیران به‌رى بیست رۆژا لیژنه‌كا تایبه‌ت ل سه‌ر ئاستێ پارێزگه‌هێ هاتیه دورستكرن بو پێناسه‌كرن ورێكخستنا خزمه‌تگوزاریان ل ناڤ كه‌رتێ تایبه‌ت وده‌رڤه‌ى كه‌رتێ تایبه‌ت هه‌روه‌سا بو كێمكرنا بهایێ وان خزمه‌تگوزاریان ولیژنێن ته‌كنیكى ژى هاتینه پێك ئینان و ده‌ست ب كارێن خۆ كریه وهه‌موو پرۆژه هاتینه دیتن ودوڤ چونا بابه‌تێن سه‌خبێركرن وپاقژكرنێ وئاڤ وئاڤ رێژا وئاڤ گران وكه‌سكاتى هاتیه كرن وئاریشه هاتینه ده‌ست نیشانكرن .
هه‌روه‌سا گوت: وروبه‌رێ هه‌ر پروژه‌كى ل به‌ر چاڤ هاتیه وه‌رگرتن ودێ بیته پیڤه‌ر بو وه‌رگرتنا بهایێ خزمه‌تگوزاریا وبهایێ نوو ب رێژا 40% كێمتر دێ هێته وه‌رگرتن وپێدڤى یه هاولاتى هه‌یڤانه ئه‌داكه‌ن.
رێڤه‌به‌رێ گشتى یێ وه‌به‌رهێنانێ دیاركر: هه‌موو خزمه‌تگوزارى ب رێكا سه‌رئێك كێمكرنێ ل دووڤ یاسایێن وه‌به‌رهێنانێ دێ هێنه راگه‌هاندن وهه‌ر كومپانییه‌كا پروژه‌ك بو بكه‌ڤیت دێ ب كارێ وان خزمه‌تگوزاریا رابیت وچاڤدێرى ژلایێ لیژنه وفه‌رمانگه‌هێن په‌یوه‌ندیدار دێ هێته كرن وخه‌لكێ وان یه‌كا ژى دێ پشكدارى پروسا چاڤدێریێ بن.
