ژبو پێشئێخستنا پرۆسا په‌روه‌رده وخاندن وزانینێ ئه‌ڤرۆ نیڤرۆ 25-7-2020ل رێڤه‌به‌ریا گشتى یا په‌روه‌ردێ ل پارێزگه‌ها دهۆكێ ب ئاماده‌بونا به‌رێزان د.ئالان حه‌مه سعید وه‌زیرێ په‌روه‌ردێ ود.على ته‌ته‌ر پارێزگه‌رێ دهوكێ وعمرعلى ته‌ها رێڤه‌به‌رێ گشتى یێ په‌روه‌ردێ ل پارێزگه‌هێ وبه‌رپرسا رێكخراوا یونسێف وچه‌ند بسپورێن په‌روه‌رده‌یى ته‌له‌فزیونا په‌روه‌رده‌یى یا دهۆك هاته ڤه‌كرن.
پشتى رێ ورسمێن ڤه‌كرنێ به‌رێزان گه‌ریانه‌ك ل ناڤ ستودیو وژۆرێن ته‌له‌فزیونێ كرن وژنێزیك سه‌حكره به‌رهه‌ڤیا كه‌نالى بو خزمه‌تكرنا پروسا په‌روه‌ردێ.
وه‌زیرێ په‌روه‌ردێ دكونگره‌كێ رۆژنامه‌ڤانیدا گوت: ئارمانج ژسه‌ره‌دانا مه بو پارێزگه‌ها دهۆكێ ئه‌وه ئه‌م ژنێزیك هایدارى پروسا ئه‌نجامدانا ئه‌زمونێن قوتابیێن پولا 12ێ ئامادیى ببین وبو ڤێ مه‌ره‌مێ مه سه‌ره‌دانا چه‌ند بنگه‌هان ل زاخو وسێمێلێ وسه‌نته‌رێ دهۆكێ كر ومه دیت پروسه ب رێك وپێكى وب ره‌نگه‌كێ نایاب برێڤه‌دچیت هه‌روه‌سا ئه‌م دگه‌ل رێڤه‌به‌رێ گشتى ورێڤه‌به‌ریێن په‌یوه‌ندیدار رونشتین وژنێزیك ئاگه‌هدارى كێم وكاسیێن په‌روه‌ردێ ل سنورێ پارێزگه‌ها دهوكێ بوین.
هه‌روه‌سا مه ب هه‌ڤكارى دگه‌ل رێكخراوا یونسێف ته‌له‌فزیونا په‌روه‌رده‌یى ل دهۆكێ ڤه‌كر كو دێ هه‌موو وانه وبه‌رنامه ب زاراڤێ بادینى هێنه پێشكێشكرن بو خزمه‌تكرنا قوتابى وماموستایان وپێشئێخستنا پروسا خاندنێ ل هه‌موو پارێزگه‌هێ .
هه‌روه‌سا گوت: مه سه‌ره‌دانا قوتابیێن ده‌ڤه‌را شنگالێ كر ئه‌وێن ل دوڤ راسپاردێن سه‌روكێ حكومه‌تا هه‌رێما كوردستانێ به‌رێز مه‌سرور بارزانى هاتینه دهۆكێ بو ئه‌نجامدانا ئه‌زمونان وجه‌نابێ سه‌روكێ حكومه‌تێ هه‌موو خه‌رجیێن حه‌واندن وهاتن وچونا وان قوتابیان ب ستویێ خۆڤه‌گریتنه ، مه وه‌كو وه‌زاره‌تا په‌روه‌ردێ ب هه‌ڤكارى دگه‌ل پارێزگه‌رێ دهوكێ ورێڤه‌به‌ریا گشتى یا په‌روه‌ردێ هه‌موو ئاسانكارى بو وان قوتابیان كرینه كو ژمارا وان (565) قوتابینه وهه‌موو كارێن وان باش هاتینه ئه‌نجامدان.
وه‌زیرێ په‌روه‌ردێ سوپاسیا پارێزگه‌رێ دهوكێ ورێكخراوا یونسێڤ كر ل دور وێ پشته‌ڤانیا بو كه‌رتێ په‌روه‌ردێ دكه‌ن نه‌خاسمه بو ڤه‌كرنا ته‌له‌فزیونا په‌روه‌رده‌یى ل دهۆكێ وته‌كه‌زكر كو ل ئاینده‌كێ نێزیك دێ رادیویه‌كا په‌روه‌رده‌یى ژى ل ده‌ڤه‌رێ ڤه‌كه‌ن.
هه‌ژى گوتنێ یه ته‌له‌فزیونا په‌روه‌رده‌یى كه‌ناله‌كێ لوكالیه (HD) یه مه‌ره‌م ژدامه‌زراندنێ ئه‌وه خزمه‌تا قوتابى وموستا وپروسا په‌روه‌ردێ ب گشتى بكه‌ت هه‌ر ژقوناغا بنه‌ره‌تى هه‌تا قوناغا په‌یمانگه‌هێ وپتر ژ(500) هزار قوتابى وماموستا ل سه‌رانسه‌رى پارێزگه‌هێ دێ مفاى ژێ بینن ، ته‌له‌فزیونا ناڤبرى ب پشته‌ڤانیا رێكخراوا یونسیف و وه‌زاره‌تا په‌روه‌ردێ وپارێزگه‌ها دهوكێ هاتیه ئاڤاكرن وبریاره ل ده‌ستپێكا هه‌یڤا هه‌شت یا ئه‌ڤ ساله 2020 ده‌ست ب په‌خشێ خو یێ زانستى بكه‌ت وبكه‌ڤیته دخزمه‌تا پروسا په‌روه‌ردێ دا.
