ژكار وچالاكیێن رێڤه‌به‌ریا گشتى یا شه‌هید وئه‌نفالكریان ل پارێزگه‌ها دهوكێ ئه‌ڤرو ئێڤارى 28/ 8/2019 ل گوندێ کورێمێ ب ئاماده‌بونا به‌رێز ماجد سه‌ید صالح نوینه‌رێ پارێزگه‌رێ دهوكێ وچه‌ند به‌رپرسێن حزبى وئیدارى وره‌وشه‌نبیرى 31سالیا كومكوژیا گوندێن كورێمێ وچه‌لكێ هاته ساخكرن.
درێ ورسمێن ڤێ چالاكیێ دا لبه‌راهیێ به‌رهه‌ڤبوى ده‌قیقه‌كێ بێ ده‌نگ راوستیان وه‌كو رێزگرتن بو خوینا شه‌هیدێن كوردستانێ و كومكوژیا گوندێن كورمێ وچه‌لكێ پاش چه‌ند ئایه‌تێن قورئانا پیروز هاتنه‌خاندن .
پاش په‌یڤا رێڤه‌به‌ریا گشتى یا شه‌هید وئه‌نفالكریان ل دهوكێ ژلایێ ژیان موسته‌فا هاته خاندن وسلاڤ وسه‌رخوشیێن خو ورێڤه‌به‌ریا گشتى یا شه‌هید وئه‌نفالكریا گه‌هاندنه كه‌س وكارێن قوربانیێن كومكوژیێ وئه‌ڤ كارێ نه‌مروڤایه‌تى یێ كو به‌رى 31سال رژێما به‌عس ل ئه‌نفالێن ره‌ش به‌رامبه‌ر سڤیلێن گوندێن كورمێ وچه‌لكێ ل سنورێ ناحیا مانگێشكێ سه‌رب قه‌زا دهوكێ ڤه ئه‌نجامداى شه‌رمزاكر وخواست كو كه‌س وكارێن قوربانیا بهێنه قه‌ره‌بوكرن.
پاش ماجد سه‌ید صالح نونه‌رێ پارێزگه‌رێ دهوكێ په‌یڤه‌ك خاند بناڤێ پارێزگه‌رى وكارگێریا پارێزگه‌ها دهوكێ ده‌ست خوشى ل رێڤه‌به‌ریا شه‌هید وئه‌نفالكریان كر بو ئه‌نجامدانا ڤێ چالاكیێ وسه‌رخوشیێن خو وپارێزگه‌رێ دهوكێ گه‌هاندنه كه‌س وكارێن كومكوژیێ وئه‌ڤ كریارا نه‌مروڤایه‌تى شه‌رمزاركر وخواست كو لایه‌نێن په‌یوه‌ندیدار یێن حكومه‌تا ئیراقێ قه‌ربویا كه‌س وكارێن كومكوژیێ بكه‌ن وهنده‌كێ ژ خه‌م ونه‌هامه‌تیا هاتیه سه‌رێ وان كێمبكه‌ن وژخودایێ مه‌زن خواست جهێ شه‌هیدێن كوردستانێ ویێن كومكوژیا گوندێن كورمێ وچه‌لكێ بكه‌ته به‌هه‌شتا به‌رین.
پاش په‌یڤا كه‌س وكارێن كاره‌ساتێ هاته خاندن لدوڤدا چه‌ند هوزان وبرگه‌كا هونه‌رى هاتنه پێشكێشكرن پاش خه‌لات لسه‌ر كه‌س وكارێن كاره‌ساتێ هاتنه به‌لافكرن ولدوماهیێ تاجه گولینه ل سه‌ر گورێن شه‌هیدێن كاره‌ساتێ هاتنه دانان.
هه‌ژى گوتنێ یه ل 28مه‌ها هه‌شت سالا 1988 به‌رى 31سال رژێما به‌عس ل ئه‌نفالێن ره‌ش تاوانه‌كا مه‌زن به‌رامبه‌ر سڤیلێن گوندێن كورمێ وچه‌لكێ ل سنورێ ناحیا مانگێشكێ سه‌رب قه‌زا دهوكێ ڤه ئه‌نجامدابو وپترى (27) كه‌سێن بێ گونه‌ه گوله‌بارانكربون پاش بره‌نگه‌كێ هوڤانه كه‌له‌خێن وان سوتبون.
بو زانین گوندێ كورمێ دكه‌ڤیته باكورێ ناحیا مانگێشكێ 45كم ژسه‌نته‌رێ پارێزگه‌ها دهوكێ یێ دوره.
