ئه‌ڤرو سپێدێ فه‌رهاد ئه‌مین ئه‌تروشی پارێزگه‌رێ دهوكێ دهه‌ڤدیتنه‌كێدا دگه‌ل سعد فارس عباس رێڤه‌به‌رێ گشتی یێ كومپانیا گشتی یا بازرگانی ودان ویله‌یی ل وه‌زاره‌تا بازرگانیا ئیراقا فیدرال دیار كر كو گه‌نم متایه‌كێ زور گرنگه بو هه‌موو خه‌لكێ ئیراقێ وهه‌رێما كوردستانێ و ته‌كه‌زكر كو زور یا فه‌ره پارێ گه‌نمێ جوتیاران بهێته دان دا ببیته هانده‌ره‌ك كو جوتیار بو سالێن بهێت ژی به‌رده‌وامیێ بده‌نه چاندنێ وبه‌رهه‌مێ خو باشبكه‌ن هه‌روه‌سا دا جوتیار ب وی پاره‌ی بشێن بهایێ ڤه‌گوهاستنا گه‌نمی بو سایلویا وبهایێ دورنا گه‌نمی و سوته‌مه‌نیێ دابینكه‌ن.
هه‌روه‌سا دیاركر كو كارگێریا پارێزگه‌هێ بزاڤێ دكه‌ت سایلویێن نوو ل ئاكرێ وسێمێلێ وروڤیا وزاخو ئاڤاكه‌ت وبه‌رهه‌ڤیا كارگێریا پارێزگه‌هێ نیشان دا بو هه‌ر هاریكاریه‌كێ بو یه‌كێ پروسا وه‌رگرتنا گه‌نمی ب رێك وپێكی بهێته ئه‌نجامدان.
رێڤه‌به‌رێ گشتی یێ كومپانیا گشتی یا بازرگانی ودان ویله‌یی ل وه‌زاره‌تا بازرگانیا ئیراقا فیدرال دیاركر كو 10هزار ته‌نێن گه‌نمێ پار سال مایه دسایلویان دا بو ناڤه‌راست وژێریا ئیراقێ دێ هێته ڤه‌گوهاستن دا گه‌نمێ وه‌رزێ ئه‌ڤ ساله ل شونا یێ پار بهێته عومباركرن.
رێڤه‌به‌رێ كومپانیا بازرگانی ودانویله‌ی ل دهوكێ دیاركر كو
پروسا وه‌رگرتنا گه‌نمی ل 28-5-2015ل سایلویێن پارێزگه‌هێ ده‌ست پێكریه ودهێته چاڤه‌رێكرن ئه‌ڤ ساله 283هزار ته‌ن بهێنه وه‌رگرتن زێده‌باری وێ چه‌ندێ كو 25هزار ته‌ن ل ده‌ڤه‌را ئه‌لقوش و38ته‌ن ل ده‌ڤه‌را شێخان سه‌ر ب پارێزگه‌ها نه‌ینه‌وا بهێنه وه‌رگرتن هه‌روه‌سا حكومه‌تا ئیراقا فیدرال به‌رهه‌ڤیا خو دیاركریه كو هه‌كه هات وسایلویێن فه‌رمی پربون ژگه‌نمی ئه‌و هنده‌ك عومبارا بكرێ بگرن وسه‌باره ت دانا پارێ گه‌نمێ جوتیاران یێ سالا بوری گوت نڤیساره‌كا فه‌رمی بو وه‌زاره‌تا بارزگانیا ئیراقا فیدرال هاتیه بلندكرن ئه‌ز باروه‌رم دێ به‌رسڤه‌كا ئه‌رێنی هێته دان. 
