ئه‌ڤرو سپێدێ 23/6/2019 ل هولا كونفرانسان ب ئاماده‌بونا به‌رێز بهزاد على ئاده‌م پارێزگه‌رێ دهوكێ ب وه‌كاله‌ت وكونسلا ئه‌لمانیا وسه‌روكێ زانكویا دهوكێ وچه‌ند به‌رپرسێن حزبى وئیدارى وجڤاكێ سڤیل كونفرانسێ نیڤ ده‌وله‌تى یێ دووێ دیدارا روژهه‌لات وروژئاڤا هاته ئه‌نجامدان .
ل رێ ورسمێن كونفرانسى یێ كو ژلایێ په‌یمانگه‌ها چاره‌سه‌ریا ده‌رونى وچاره‌سه‌ریا تراومایێ (هه‌لهژیان) ێ هاتیه ل دارخستن چه‌ند په‌یڤ هاتنه خاندن ژوانا په‌یڤا رێڤه‌به‌ریا كونفرانسى ژلایێ د مه‌مو به‌رپرسێ په‌یمانگه‌ها ناڤبرى هاته خاندن وبخێر هاتنا هه‌موو به‌رهه‌ڤبویان كر وئامارنجا سازكرنا كونفرانسى به‌رچاڤكر.
پاش په‌یڤێن جودا جودا هاتنه خاندن.
هه‌ر بڤێ هه‌لكه‌فتێ بهزاد على ئاده‌م پارێزگه‌رێ دهوكێ ب وه‌كاله‌ت په‌یڤه‌ك خاند وبناڤێ كارگێریا پارێزگه‌هێ بخێر هاتنا به‌رهه‌ڤبویێن كونفرانسى كر وده‌ست خوشى ل په‌یمانگه‌ها چاره‌سه‌ریا ده‌رونى وچاره‌سه‌ریا تراومایێ (هه‌لهژیان) ێ كر بو رێكخستنا كونفرانسێ ده‌رونى وسه‌ركه‌فتن بو به‌رنامێن كونفرانسى خواست.
هه‌روه‌سا سوپاسیا هه‌موو ده‌زگه‌ه وسازیێن حكومه‌تا ئه‌لمانیا كر كو ل پێنچ سالێن ده‌ربازبوى گه‌له‌ك هاریكاریا خه‌لكێ پارێزگه‌ها دهوكێ ب تایبه‌تى یا ئاواره وپه‌نابه‌ران كریه .
پارێزگه‌رێ دهوكێ ب وه‌كاله‌ت ته‌كه‌زكر كو په‌یمانگه‌ها چاره‌سه‌ریا ده‌رونى وچاره‌سه‌ریا تراومایێ (هه‌لهژیان) ێ ب پشته‌ڤانیا حكومه‌تا ئه‌لمانیا هاتیه ئاڤاكرن بو چاره‌سه‌ریا نه‌خوشیێن ده‌رونى ئه‌ڤ بخو ژى وێ چه‌ندێ دسه‌لمینیت كو خه‌لك وحكومه‌تا ئه‌لمانیا گرنگیێ دده‌نه ده‌ڤه‌رێ .
هه‌روه‌سا گوت : دوهى 22-6-2019 ل باژێرێ ئیسن ل ئه‌لمانیا پروتوكوله‌كێ ساخله‌میێ دناڤبه‌را به‌رێز فه‌رهاد ئه‌مین ئه‌تروشى پارێزگه‌رێ دهوكێ وپارێزگه‌رێ ئیسن ل ئه‌لمانیا هاتیه واژوكرن بو ئالوگوركرنا پێزانینێن ساخله‌میێ دناڤبه‌را سازیێن ساخله‌میێ دناڤبه‌را دهوك وئیسن دا.
ل دوماهیێ ته‌كه‌زى ل سه‌ر خورتكرنا په‌یوه‌ندیان دناڤبه‌را پارێزگه‌ها دهوكێ وحكومه‌تا ئه‌لمانیا كر نه‌خاسمه رێكخراوا (GIZ) یا ئه‌لمانى كو به‌رى نوكه گه‌له‌ك هاریكاریا پارێزگه‌هێ كریه وسوپاسیا هه‌موو لایه‌نان كر كو ئه‌ڤ كونفرانسه رێكخستى وسه‌ركه‌فتن بو هه‌موویان خواست.
پاش چه‌ند سمینار وبابه‌ت ژلایێ ماموستا وبسپورێن ده‌رونى هاتنه پێشكێشكرن.
بریاره سوبه‌هى ژى24-6-2019 به‌رده‌وامى ب به‌رنامێن كونفرانسى بهێته دان.
