لدووڤ به‌رنامێ كابینا (9) یا حكومه‌تا هه‌رێما كوردستانێ وئه‌و گوهورینێن دناڤ فه‌رمانگه‌هێن میرى دا دهێنه كرن ئه‌ڤرۆ به‌رى نیڤرۆ 21/12/2020 ب ئاماده‌بوونا به‌رێزان (محمد محمد سعید) وه‌زیرێ ره‌وشه‌نبیرى و لاوان و د.على ته‌ته‌ر پارێزگارێ دهۆكێ ود .سالار ئوسمان بریكارێ وه‌زاره‌تا ره‌وشه‌نبیرى وچه‌ند سه‌رپشكێن رێڤه‌به‌ریێ رێ ورسمێن گوهورینا رێڤه‌به‌رێ گشتى یێ ره‌وشه‌نبیرى وهونه‌رى ل پارێزگه‌ها دهۆكێ هاتنه گێران و(ئه‌میر على) ل شوونا (ئه‌یوب ره‌مه‌زان) هاته دانان.
وه‌زیرێ ره‌وشه‌نبیرى و لاوان وپارێزگارێ دهۆكێ دپه‌یڤێن جودا جودا دا په‌سنا رولێ رێڤه‌به‌ریا ره‌وشه‌نبیرى وهونه‌رى ل پارێزگه‌هێ ورێڤه‌به‌رێ وێ یێ به‌رێ كر كو ل سالێن ده‌ربازبوى سه‌ره‌رایى هه‌بونا چه‌ندین قه‌یرانان شیاینه چه‌ندین چاڵاكیێن هونه‌رى وره‌وشه‌نبیرى وكلتورى ئه‌نجامده‌ن وخزمه‌تا ره‌وشه‌نبیریا ده‌ڤه‌رێ بكه‌ن وده‌ست خوشى ل رێڤه‌به‌رێ به‌رێ وتیمێ كارى كر.
هه‌روه‌سا پیروزباهى ل رێڤه‌به‌رێ نوو كر وداخازا سه‌ركه‌فتنێ بو خواست وپشته‌ڤانیا خو نیشان دا بو هه‌موو بزاڤ وچالاكیێن رێڤه‌به‌ریا گشتى یا ره‌وشه‌نبیرى وهونه‌رى ل پارێزگه‌ها دهوكێ.
پاش رێڤه‌به‌رێ ره‌وشه‌نبیرى وهونه‌رى یێ به‌رێ راپورته‌ك ل دوور وان كار وچاڵاكیێن هه‌ر ساڵ ژلایێ رێڤه‌به‌ریا گشتى یا ره‌وشه‌نبیرى وهونه‌ریڤه دهاتنه ئه‌نجامدان پێشكێشكروداخاز ژوه‌زیرێ ره‌وشه‌نبیرى وپارێزگارێ دهۆكێ كر كو پشته‌ڤانیێ ل رێڤه‌به‌رێ نوو بكه‌ن دا بشێت به‌رده‌وامیێ بده‌ته به‌رنامێن رێڤه‌به‌ریێ یێن ساڵانه.
ژلایێ خوڤه رێڤه‌به‌رێ نوو سوزا كو ل جهێ وێ باوره‌یێ بیت یا پێهاتیه راسپاردن وب وه‌فادارى خزمه‌تا بزاڤا هونه‌رى وره‌وشه‌نبیریا پارێزگه‌هێ بكه‌ت.
