ئه‌ڤرو 7-9-2020ل قه‌زا ئامێدیێ به‌رێز مسرور بارزانى سه‌روكێ حكومه‌تا هه‌رێما كوردستانێ ب ئاماده‌بونا به‌رێزان رێبه‌ر احمد وه‌زیرێ نافخوو وسامان به‌رزنجى وه‌زیرێ ته‌ندورستى ود.على ته‌ته‌ر پارێزگه‌رێ دهوكێ وچه‌ند به‌رپرسێن كارگێرى وحزبى وخه‌لكێ ده‌ڤه‌رێ به‌رێ بنیاتى بو ئاڤاكرنا نه‌خوشخانه‌كا مه‌زن یا سه‌د ته‌ختى ل كومه‌لگه‌ها هێتوتێ ل قه‌زا ئامێدیێ دانا.
درێ ورسمێن دانانا به‌رێ بنیاتێ پروژه‌ى دا سه‌روكێ حكومه‌تا هه‌رێما كوردستانێ رولێ خه‌لكێ ده‌ڤه‌رێ دخه‌بات وقوربانیدانێدا به‌رز هه‌لسه‌نگاند وته‌كه‌زكر كو حكومه‌تا هه‌رێما كوردستانێ ب هه‌موو شیانێن خو دێ بزاڤێ كه‌ت كو پتر پروژێن خزمه‌تگوزارى ل ڤێ ده‌ڤه‌رێ ئه‌نجامده‌ت وئاڤاكرنا ڤێ نه‌خوشخانێ ده‌ستپێكه بو ئه‌نجامدانا چه‌ندین پروژێن دى یێن خزمه‌تگوزارى وپیروزباهى ل خه‌لكێ ده‌ڤه‌رێ كر وخواست كو پروژه ب كوالیتییه‌كا باش ول ده‌مێ ده‌ست نیشانكرى بكه‌ڤیته دخزمه‌تا هاولاتیێن ده‌ڤه‌را ئامێدیێ دا.
هه‌ر دڤان رێ ورسمان دا هه‌ر ئێك ژپارێزگه‌رێ دهوكێ و وه‌زیرێ ته‌ندورستى په‌یڤێن خو پێشكێشكرن وگرنگیا ئاڤاكرنا ڤێ نه‌خوشخانێ بو خه‌لكێ ده‌ڤه‌رێ به‌رچاڤكر.
هه‌ژى گوتنێ یه پروژێ ئاڤاكرنا نه‌خوشخانه‌كا مه‌زن یا سه‌د ته‌ختى ل قه‌زا ئامێدیێ كو ژپێنچ نهوما وپشكێن نشته‌رگه‌ریێ ونڤاندنێ وزاروكبونێ وچاره‌سه‌ریێن جورا وجور ل سه‌ر روبه‌رێ (21,000) مترێن دوجاركى ول سه‌ر بودجا حكومه‌تا هه‌رێما كوردستانێ ب كوژمێ (43) ملیار دینارا دهێته ئه‌نجامدان وبریاره پروژه دماوێ (990) رۆژان دا ب دوماهى بهێت وبكه‌ڤیته دخزمه‌تا خه‌لكێ قه‌زا ئامێدیێ دا وخه‌لكێ ناحیێن (سه‌رسنك- بامه‌رنێ – شێلادزێ – دێرالوك- وچه‌مانكێ) سه‌رب قه‌زایێ ڤه دێ مفاى ژێ وه‌رگرن.
