ئه‌ڤرو سپێدێ 15-4-2019 ل ئاماده‌یا بژاره ل ژێر دوریشمێ(به‌هره وداهێنان) وب چاڤدێریا به‌رێز فه‌رهاد ئه‌مین ئه‌تروشى پارێزگه‌رێ دهوكێ وئاماده‌بونا چه‌ند به‌رپرسێن حزبى وئیدارى ڤیستیڤالا زانستى كلتورى وه‌رزشى یا كولیژا دهوك یا به‌هره‌داران هاته سازكرن .
لبه‌راهیێ هشیار عمر رێڤه‌به‌رێ كولیژا دهوك یا به‌هره‌داران په‌یڤا بخێر هاتنێ وڤه‌كرنا ڤیستیڤالێ خاند وگوت: ئارمانج ژڤه‌كرنا ڤیستیڤالێ ئه‌وه شیانێن قوتابیان دوارێن جودا جودا بو به‌رهه‌ڤبویان به‌رچاڤكه‌ین .
هه‌روه‌سا گوت: سه‌ره‌رایى چه‌ندین ئاسته‌نگا كولیژا به‌هره‌داران شیایه ژماره‌كا باش یا قوتابیان پێبگه‌هینن و 19قوتابى ل كولیژا نوشدارى و15قوتابیێن دى ل كولیژا ئه‌ندازیارى هاتینه قه‌بولكرن وبتنێ دوو قوتابى ژبه‌ر هوكارێن تایبه‌ت ڤه‌ماینه وژلایه‌نێن به‌رپرس خواست كو پشته‌ڤانیا پتر ل كولیژا وان بكه‌ن.
هه‌ربڤێ هه‌لكه‌فتێ عمر على ته‌ها رێڤه‌به‌رێ گشتى یێ په‌روه‌ردێ ل پارێزگه‌هێ دپه‌یڤه‌كێدا ده‌ست خوشى ل رێكخه‌رێن ڤیستیڤالێ كر وسه‌ركه‌فتن بو هه‌موو قوتابى وماموستایان خواست .
پاش پارێزگه‌رێ دهوكێ په‌یڤه‌ك پێشكێشكر وبناڤێ كارگێریا پارێزگه‌هێ ده‌ست خوشى ل رێكخه‌رێن ڤیستیڤالێ كر وهیڤى خاستن ده‌رچویێن كولیژێ ئایندێ كوردستانێ ئاڤاكه‌ن.
هه‌روه‌سا پارێزگه‌رێ دهوكێ سوپاسیا هه‌موو ماموستا وفه‌رمانبه‌رێن په‌روه‌ردێ كر كو ل سالێن قه‌یرانێ به‌رده‌وامى دایه پروسا خاندنێ ونه‌هێلایه براوستیت.
هه‌روه‌سا ته‌كه‌زكر كو دڤێت سازیێن حكومه‌تێ تایبه‌تى كه‌رتێ په‌روه‌ردێ مروڤێ كورد دهه‌موو بواره‌كیدا ئاڤاكه‌ت وزانین وزانستێ بكه‌نه ئالاڤێ پێشئێخستنا جڤاكێ كورد وده‌وله‌تێ.
پاش سرودا كولیژێ وكورالێ به‌هره‌داران هاته پێشكێشكرن.
ل دویڤدا چه‌ندین ڤه‌كولینێن زانستى دبوارێ كیمیا وفیزیا وبایولوجى وزمانێ كوردى وتكنولوجیا ژلایێ قوتابیێن كولیژێ هاتنه پێشكێشكرن.
پاش پێشانگه‌هێن زانستى وماتماتیكێ وكه‌له‌پورى و وهونه‌رى وه‌رزشى هاتنه ڤه‌كرن.
هه‌ژى گوتنێ یه ل سالا 2014ێ كولیژا دهوك یا به‌هره‌داران هاتیه ئاڤاكرن ونوكه 45قوتابی ل قوناغێن جودا جودا دخوینن وسیسته‌مێ وه‌رگرتنا قوتابیان پشتى قوناغا شه‌شێ بنه‌ره‌تى دهێنه وه‌رگرتن پشتى تاقیكرنه‌كا تایبه‌ت پێ دهێته كرن.
