ئەڤرۆ پشتی نیڤرۆیا رۆژا چوارشەمبی رێکەفتی ١٦ی چریا دووێ ٢٠٢١ێ بەرێزان “رێبەر ئەحمەد”وەزیرێ نافخۆ و “ئانو جەوهەر” وەزیرێ ڤەگۆهاستنێ یێن حکۆمەتا هەرێما کوردستانێ و بەرێز
“د.عەبدولحەکیم خسرو” سەرۆکێ فەرمانگەها دیفچوون و هەماهەنگیێ، سەرەدانا کۆچکا پارێزگەها دهۆکێ دا و ژلایێ بەرێز “د.عەلی تەتەر” پارێزگارێ دهۆکێ و ب بەرهەڤبوونا بەرێز “گوهدار شێخو” سەرپەرشتێ ئیدارا سەربەخۆیا زاخۆ هاتنە پێشوازیکرن.
پاشان دکۆمبوونەکێدا دگەل دامودەزگەهێن پەیوەندیدار یێن کارگێریا پارێزگەها دهۆکێ و ئیدارا سەربەخۆیا زاخۆ ل دۆر کێشێن ئەرد و زەڤیێن کرستیانان پشتی سالەکێ ژدەرکەفتنا بریارا ژمارە ٨٣ یا حکۆمەتا کوردستانێ کۆمبوون.
دپەیڤەکێدا وەزیرێ نافخۆ ئاماژە ب بەرنامێ حکۆمەتا هەرێما کوردستانێ بۆ پاراستنا ئەردێ پێکهاتەیان و خۆیشکوبرایێن کرستیان کر و دۆپاتی ل جێبەجيکرنا قانونا نەهێلانا ئەنجامدانا زێدەگاڤیان ل سەر ڤان ئەردان و بریارين لژنا بلندا حکۆمەتا هەرێما کوردستانێ کر و دادیارکرن حکۆمەتا هەرێما کوردستانێ خۆ ب بەرپرسیار دبینیت بەرامبەر پاراستنا مافێن هاولاتیێن هەرێما کوردستانێ ژهەمی پێکهاتەیان و هیڤیدارین کێشەیێن مایی ل دویڤ قانونێ و ب دادپەروەری بهێنە چارەکرن و دەستخۆشی ژی ل یەکەیێن کارگێری کر کو سکالایێن هاولاتیێن کرستیان وەرگرتینە و هەولێن چارەسەریێ قۆناغەکا باش دەربازکرینە و لایەنێن پەیوەندیدار راسپاردن ل چارەسەریێن بنەرەتی بۆ ڤان بابەتان و ب وەکهەڤی دبەردەوام بن.
پاشان وەزیرێ ڤەگۆهاستنێ یێ حکۆمەتا هەرێما کوردستانێ بەحس ل وان سکالا و گلەوگازندە و کێشێن ئەردێن کرستیانان کر و هژمارەکا کەیسێن پێدڤی چارەسەریێ دکۆمبوونێدا بەحسکرن.
پاشان هەر ئێک ژ پارێزگارێ دهۆکێ و سەرپەرشتێ ئیدارا زاخۆ ئەو پێنگاڤێن کریاری بۆ چارەکرنا ڤان کەیسان و کەیسێن پێدڤی ئێکلاکرن و چارەکرنێ بەحسکرن. لدویڤدا دەڤەردارێن پارێزگەها دهۆکێ پشتی وەرگرتنا سکالایان بۆ دەمێ سێ هەیڤان دەرئەنجامێن سکالایان و چارەکرنا وان بۆ کۆمبوونێ بەرچاڤکرن.
ل دۆماهیێ دکۆنگرەکێ رۆژنامەڤانی بەرێز “رێبەر ئەحمەد” وەزیرێ نافخۆ یێ حکۆمەتا هەرێما کوردستانێ و سەرۆکێ لژنا بلندا ئاریشێن ئەردێ کرستیانان ل حکۆمەتا هەرێما کوردستانێ بۆ رایا گشتی هاتنە راگەهاندن.
