لژنا بلندا بەرھەنگاربوونا کۆرۆنایێ ل پارێزگەھا دھۆکێ ئەڤرۆ رۆژا چارشەمبی ٢٧/١٠/٢٠٢١ کۆمبوونەک ب سەرپەرشتیا “د.عەلی تەتەر” پارێزگارێ دھۆکێ ئەنجام دا و چەندین رێنما و بڕیارێن نوی ژ پێخەمەت پاراستنا گیانێ وەلاتیان ژ ڤایرۆسێ کۆرۆنایێ دەرکرن.
پ.د.عەلی تەتەر، پارێزگارێ دھۆکێ د کونگرەکێ رۆژنامەڤانی دا ئاشکرا کر کو ھەمی ئەو رێکارێن د بەیانا ژمارە ٣١ یا لیژنا بلندا بەرھەنگاربوونا ڤایرۆسێ کۆرۆنایێ ل ھەرێما کوردستانێ ھاتینە دەرکرن د ڤێ کۆمبوونێ دا دانوستاندن ل دۆر ھاتەکرن کو وەکو خوە بھێنە بجھئینان و گۆت: “د کۆمبوونا لیژنا بلندا بەرھەنگاربوونا کۆرۆنایێ دا ل پارێزگەھا دھۆکێ مە ھەمی بزاڤێن خوە کرن کو ئەم چو بەربەستان د رێیا ژیان و کارێ خەلکی دا چێنەکەین، بەلێ مە بڕیار ل سەر ھندەک کاران دا کو گەلەک ب سانەھی دھێنە بجھئینان ژوان ژی بڕیار ھاتیەدان ھەمی کەس ڤاکسینێ وەرگرن ب تایبەتی فەرمانبەر و قوتابی و مامۆستا زێدەباری ڤێ چەندێ ھەر کەسەکێ بچیتە د ناڤ جھەکێ گرتی دا پێدڤیە ماسکی گرێدەت، ھەروەسا نابیت تازی ب ھیچ شێوەیەکی بھێنەدانان و قەدەغەنە و دڤێت سەرەخوشیێن تازیان ل بنەمالا وەغەرکری ب رێیا تەلەفۆنان بن”.
پارێزگارێ دھۆکێ ئاماژە دا وێ چەندێ کو ھەر کۆمبوون یا کۆنفرانسەکێ گرنگ ھەبیت بھێتە ئەنجامدان دڤێت ئەو کەسێن پشکدار دبن ڤاکسین وەرگرتبیت یان ژی پشکنینان کۆرۆنایێ دگەل دابیت کو ئەو کەسێ پشکدار نەھەلگرێ ڤایرۆسێ کۆرۆنایێ یە.
سەبارەت گرانبوونا بھایێ سۆتەمەنیێ ناڤھاتی گۆت: “ل سەرانسەری جیھانێ پەنزین و گازوایل یا گرانبووی، ھەر کەسەک یان بازرگانەکێ پەنزینێ یان ھەر کەرەستەکێ دی یێ سوتەمەنیێ بینیتە د ناڤ پارێزگەھا دھۆکێ دا ئەم دێ مۆلەتێ دەینێ ب مەرجەکی کوالێتیا دروست بیت و ئەڤرو حکومەتا هەرێما کوردستانێ دێ کومبیت بو چارەکرنا بابەتێ ناڤبری
“.
