به‌رێز فه‌رهاد ئه‌مین ئه‌تروشی پارێزگه‌رێ دهوكێ سه‌رپه‌رشتیا كومبوننه‌كا تایبه‌ت دگه‌ل جێگرێ پارێزگه‌رێ دهوكێ وهارریكارێ پارێزگه‌ری بو كاروبارێن ئاواره‌یان وقایمقامێن هه‌ر هه‌فت قه‌زایێن پارێزگه‌هێ ورێڤه‌به‌رێن گشتی یێن فه‌رمانگه‌هێن میری ل پارێزگه‌هێ كر.
دكومبونێدا پارێزگه‌رێ دهوكێ دیاركر كو ئارمانجا سه‌ره‌كی ژكومبونێ ئه‌وه ئاستێ هه‌ڤكاریێ دناڤبه‌را یه‌كه‌یێن ئیداری ل هه‌ر قه‌زایه‌كێ ورێڤه‌به‌رێن گشتی پتر بهێته خورتكرن دا ب شێوه‌كێ باشتر خزمه‌تا گشتی یا وه‌لاتیان بهێته كرن.
پاش ئه‌جیندایێن كومبونێ هاتنه دیاركرن وئه‌ڤ ته‌وه‌ره بخوڤه دگرتن (هه‌لسه‌نگاندنا كاروخزمه‌تكاریێن دماوێ ساله‌كێدا هاتینه ئه‌نجامدان– هاتنا وه‌رزێ هاڤینێ وچاوانییا ئه‌كتیفكرنا كارێ سازیێن ته‌ندورستی بو به‌رسنگرتنا نه‌خوشیێن هاڤینێ – كونترولكرنا نه‌خوشیێن په‌له‌وه‌ران – ره‌وشا رونشتڤانێن كه‌مپا وچاوانیا خوشكرنا خوشگوزاریا خه‌لكێ وان –ساخكرنا روژا پارێزگه‌هبونا دهوكێ – بابه‌تێ نه‌هێلانا زێده‌گاڤیا – وه‌رگرتنا به‌رهه‌مێ جوتیاران – گه‌هاندنا خزمه‌تكاریا بو ده‌ڤه‌رێن زومار وجهێن نوو رزگاركری )
سه‌باره‌ت هه‌لسه‌نگاندنا خزمه‌تكاریا دساله‌كێ دا پارێزگه‌رێ دهوكێ گوت مه دڤێت هه‌لسه‌نگاندنه‌كا هور بهێته كرن وهه‌ر كێماسییه‌كا هه‌بیت تایبه‌ت ئه‌و خزمه‌تكاریێن گرێدای ب خه‌لكیڤه بهێنه دیاركرن دا كار بو سالا ل دوڤدا ل سه‌ر بهێته كرن وخزمه‌تا وه‌لاتیان باشتر بهێته كرن ولدور زێده‌گاڤیا دیاركر كو نه‌هێلانا زێده‌گاڤیا به‌رپرسیاره‌تیا هه‌موویانه ودڤێت ئه‌م هه‌موو بهه‌ڤره كاربكه‌ین ولدوڤ رێنمایا ویاسایێ سه‌ره‌ده‌ریێ دگه‌ل سه‌رپێچكارابكه‌ین چونكو زێده‌گاڤی دیدارده‌كه دڤێت بهێته كونترولكرن هه‌روه‌سا دڤێت كارێن پێشئێخستنا كه‌رتێ كشتوكالی ژزێده‌گاڤیا بهێنه جوداكرن ،سه‌باره‌ت ده‌ڤه‌رێن رزگاركری پارێزگه‌رێ دهوكێ گوت دڤێت سه‌ره‌دانا ده‌ڤه‌رێن رزگاركری بهێته كرن وخزمه‌تكاری بو خه‌لكی بهێنه دابینكرن دا خه‌لكێ ڤه‌گه‌ریای بشێت ژیانا خو یا روژانه ده‌ربازبكه‌ت هه‌روه‌سا ببیته هانده‌ره‌ك كو خه‌لكه‌كێ دی یێ ئاواره‌ژی ڤه‌گه‌ریته سه‌ر وارێن خو. ..
پاش ده‌لیڤه ل هه‌مبه‌ر به‌رهه‌ڤبویان هاته ڤه‌كرن وب تێر وته‌سه‌لی دان وستاندن ل سه‌ر هه‌موو ئه‌جیندایێن كومبونێ هاتنه كرن.
ل دوماهیا كومبونێ ئه‌ڤ بریاره هاتنه دان (كاره‌با گشتی یا به‌رده‌وام بو خه‌سته‌خانان وپروژێن ئاڤێ وسه‌نگه‌رێن به‌ریێن شه‌ری بهێته دابینكرن- چێكرن وسه‌خبێركرنا رێكێن كه‌مپا ورێكێن گشتی – چاره‌سه‌ركرنا ئاریشا ئاڤا گران لناڤ پروژێن ئاكنجیكرنێ – ئاماده‌كاری بهێنه كرن بو پێشوازیكرنا هه‌یڤا ره‌مه‌زانا پیروز- دابینكرنا جهێن بێن ڤه‌دانێ ل سه‌ر رێ ورێباران – سه‌ره‌دانا رێڤه‌به‌رێن فه‌رمانگه‌ها بو ده‌ڤه‌رێن رزگاركری – خو به‌رهه‌ڤكرن بو وه‌رگرتنا به‌رهه‌مێ گه‌نمی وپاراستنا مافێن جوتیاران – خو ئاماده‌كرن بو ساخكرنا روژا پارێزگه‌هبونا دهوكێ – ساخكرنا بیره‌وه‌ریا 3-8 روژا كاره‌ستا جینوسایدكرنا كوردێن ئێزدی یێن شنگالێ وبرایێن مه‌سیحی وچه‌ند بریارێن دن یێن گرنگ هاتنه دان ).
