ئه‌ڤرو نیڤرو 30-5-2017ل هولا كومبونا ب سه‌رپه‌رشتیا به‌رێز فه‌رهاد ئه‌مین ئه‌تروشی وب ئاماده‌بونا هه‌موو قایمقامێن قه‌زایێن پارێزگه‌هێ كومبونا لیژنا وه‌رگرتنا گه‌نمێ جوتیاران هاته ئه‌نجامدان.
دكومبونێدا ل به‌راهیێ رێڤه‌به‌رێ گشتی یێ چاندنێ راپورته‌ك ل دور ره‌وشا چاندنێ وبه‌رهه‌مێ گه‌نم وجه‌هی یێ دهێته پێشبینیكرن كو ژجوتیارێن ده‌ڤه‌رێ بهێته وه‌رگرتن، هه‌روه‌سا رونكرن دانه سه‌ر بریارا حكومه‌تا عیراقێ ل دور وه‌رگرتنا گه‌نمێ جوتیارێن كوردستانێ وپشكا بو پارێزگه‌ها دهوكێ هاتیه ته‌رخانكرن وبه‌رهه‌ڤیێن لناڤا سایلویان وبنگه‌هێن وه‌رگرتنێ هاتینه كرن بو وه‌رگرتنا گه‌نمێ جوتیارا.
پاش گه‌نگه‌شێن تێر وته‌سه‌ل ل سه‌ر میكانزما وه‌رگرتنا گه‌نمی ل ناڤ سایلویا وگوره‌پانێن وه‌رگرتنێ هاتنه كرن.
پارێزگه‌رێ دهوكێ ته‌كه‌ز كر كو دڤێت به‌رهه‌مێ جوتیارا ب ره‌نگه‌كێ رێك وپێك بهێته وه‌رگرتن ول دویڤ تومارێن رێڤه‌به‌ریا چاندنێ بن هه‌روه‌سا لیژنێن وه‌رگرتنا به‌رهه‌مێ جوتیارا لدویڤ رێنمایێن وه‌رگرتنێ كاربكه‌ن وچاره‌سه‌ریا هه‌ر ئاریشه‌كا هه‌بیت بكه‌ن بو وێ یه‌كێ پروسا وه‌رگرتنا گه‌نمی بێ گازنده بهێته ئه‌نجامدان ومافێ جوتیارا نه هێته به‌رزه‌كرن.
ل دوماهیێ چه‌ند بریار هاتنه دان بو وێ چه‌ندێ ئه‌ڤ ساله‌ژی وه‌كو هه‌ر سال پروسا وه‌رگرتنا به‌رهه‌مێ جوتیاران بكێمترین گازنده بهێته ئه‌نجامدان.
هه‌ژی گوتنێ یه ئه‌ڤ ساله حكومه‌تا عیراقێ بریار دایه كو بتنێ (442) هزار تونێن گه‌نمێ جوتیارێن كوردستانێ وه‌رگریت وپشكا پارێزگه‌ها دهوكێ دبیته (175) هزار تون وپێشبینی دهێته كرن به‌رهه‌مێ جوتیارێن پارێزگه‌هێ بگه‌هیته (344) هزار تونان .
بهایێن ئه‌ڤ ساله بو وه‌رگرتنا گه‌نمی هاتیه ده‌ست نیشانكرن ئه‌ڤه‌نه:-
(گه‌نمێ پله ئێك 560هزار دینار- گه‌نمێ پله دوو 480هزار دینار- گه‌نمێ پله سێ 420هزار دینار).
