ئه‌ڤرۆ سپێدێ 6-10-2020 به‌رێز د.على ته‌ته‌ر پارێزگه‌رێ دهۆكێ ب ئاماده‌بونا رێڤه‌به‌رێ گشتى یێ چاڤدێریا كۆمه‌ڵایه‌تى دكونگره‌كێ رۆژنامه‌ڤانیدا پروسا به‌ڵاڤكرنا هاریكاریێن دراڤى وئاهێن خارنێ یێن سه‌روكێ حكومه‌تا هه‌رێما كوردستانێ ل سه‌ر هه‌ژار وكێمده‌رامه‌تا لسنورێ پارێزگه‌ها دهۆكێ راگه‌هاند.
پارێزگه‌رێ دهۆكێ گوت: به‌ڵاڤبونا په‌تایا كورونایێ ل هه‌موو جیهانێ ول هه‌رێما كوردستانێ كارتێكرنه‌كا خراب كریه سه‌ر ژین وژیارا هاوڵاتیان وهه‌ر ژده‌ستپێكێ حكومه‌تا هه‌رێما كوردستانێ به‌رهه‌ڤى كرینه بو هاریكاریكرنا هه‌ژار وكێمده‌رامه‌تا و(50) هزار پشكێن خارنێ ل سه‌ر هاوڵاتیان به‌ڵاڤكرینه هه‌روه‌سا خێرخازێن پارێزگه‌هێ ورێكخراوێن مروڤایه‌تى نێزیكى (100) هزار پشكێن ئاهێن خارنێ به‌ڵاڤكرینه وڤێ جارێ ژى لدوڤ فه‌رمانا به‌رێزمسرور بارزانى سه‌روكێ حكومه‌تا هه‌رێمێ هاریكاریێن دراڤى دێ لسه‌ر (35) هزار خێزانێن كێمده‌رامه‌ت هێنه به‌ڵاڤكرن ، بو هه‌ر خێزانه‌كێ (100) هزار دینار هاتینه دابینكرن گوژمێ گشتى یێ ڤان هاریكاریا (3) ملیار و(500) ملیون دینارن ب رێكا حسابێن بانكى دێ هێنه به‌ڵاڤكرن.
هه‌روه‌سا دیاركر كو به‌هره‌كا برنجى لسه‌ر (87) هزار خێزانێن دى یێن كێمده‌رامه‌ت دێ هێته به‌ڵاڤكرن وبو هه‌ر خێزانه‌كێ (50) كیلو هاتینه ته‌رخانكرن وهه‌موو دبیته (4350) ته‌نێن برنجى كو ب رێكا وه‌زاره‌تا سامانێن سروشتى هاتینه دابینكرن وب هه‌ڤكارى دگه‌ل وه‌زاره‌تا كاروبارێن كومه‌ڵایه‌تى دێ هێته به‌ڵاڤكرن.
