ئه‌ڤرو سپێدێ 29/10/2019 به‌رێز دانا عبدالكریم حه‌مه صالح وه‌زیرێ ئاڤه‌دانكرن ونێشته‌جێكرنێ وشانده‌كێ وه‌زاره‌تێ سه‌را كوچكا پارێزگه‌ها دهوك دا ژلایێ به‌رێز فه‌رهاد ئه‌مین ئه‌تروشى پارێزگه‌رێ دهوكێ وئوسمان یونس جێگرێ پارێزگه‌رى بو كاروبارێن ته‌كنیكى پێشوازى لێ هاته كرن.
دهه‌ڤدیتنه‌كێدا به‌حسێ ره‌وشا رێك وپرا ل سنورێ پارێزگه‌ها دهوكێ وبه‌رنامێ وه‌زاره‌تا ئاڤادانكرنێ بو سه‌خبێركرنا رێك وپرا ل ده‌ڤه‌رێ ودووڤ چون وهه‌ما هه‌نگى دناڤبه‌را پارێزگه‌ها دهوكێ و سازیێن وه‌زاره‌تا ئاڤادانكرنێ ب گشتى هاته كرن.
دكونگره‌كێ روژنامه‌ڤانیدا پارێزگه‌رێ دهوكێ خوشحالیا خو ب سه‌ره‌دانێ دیاركر وته‌كه‌زكر كو جارا دووێ یه وه‌زیرێ ئاڤادانكرنێ سه‌را پارێزگه‌ها دهوكێ دكه‌ت ودووڤ چونا پروژێن وه‌زاره‌تێ دكه‌ت وئه‌ڤه ژى نیشانا وێ یه‌كێ كو وه‌زیرێ ئاڤادانكرنێ یێ رژده ودڤێت ژنێزیك دووڤ چونا پروژێن وه‌زاره‌تێ بكه‌ت نه‌خاسمه رێك وبانا وسه‌خبێركرنا وان هه‌روه‌سا دڤێت ئه‌م وه‌كو كارگێریا پارێزگه‌هێ هه‌ماهه‌نگییه‌كا باش دگه‌ل تیمێن وان بكه‌ین بو وێ یه‌كێ هه‌موو پروژێن ده‌ست نیشانكرى وفه‌ر بكه‌ڤنه دخزمه‌تا خه‌لكێ پارێزگه‌هێ دا.
پارێزگه‌رێ دهوكێ ئه‌و یه‌ك ژى دیاركر كو ل سالێن ده‌ربازبوى ل دوڤ شیانا پروژێن رێك وپرا هاتینه بجهئینان وئومیده‌وارین ل سالێن بهێت پروژێن باشتر بهێنه ئه‌نجامدان.
ژلایێ خوڤه وه‌زیرێ ئاڤه‌دانكرنێ دیاركر كو ئارمانج ژسه‌ره‌دانێ ئه‌وه ئه‌م ژنێزیك سه‌حكه‌ینه وان پروژێن ل سنورێ پارێزگه‌ها دهوكێ دهێنه ئه‌نجامدان وحكومه‌تا هه‌رێما كوردستانێ (10)ملیار دینار ته‌رخانكرینه بو پروژا ل پارێزگه‌ها دهوكێ نه‌خاسمه سه‌خبێركرنا رێك وپرا ودوهى 28-10-2019 مه سه‌را هنده‌ك پروژا دا وئه‌ڤرو 29-10-2019 دێ سه‌ره‌دانا هنده‌كێن دن كه‌ین وبریاره پتریا رێكێن ده‌ڤه‌رێ بهێنه چێكرن وسه‌خبێركرن هه‌تا ناڤه‌راستا مه‌ها دووزده ب ده‌ماهى بهێن وبكه‌ڤنه دخزمه‌تا وه‌لاتییان دا.
هه‌روه‌سا گوت: ئه‌ڤ ساله پروژێن باش ل پارێزگه‌ها دهوكێ دێ هێنه ئه‌نجامدان ول سالێن بهێت پروژێن باشتر دێ هێنه دورستكرن.
ل دور چێكرنا تونێلا چیایێ مه‌تین وه‌زیرێ ئاڤادانكرنێ گوت: وه‌كو قوناغا ئێكێ كومپانییه‌كا تایبه‌ت ڤه‌دیتنێن پروژه‌ى ئاماده‌كه‌ت پاش پروژه ب رێكا ته‌نده‌ران دێ هێته را گه‌هاندن ولداهاته‌كێ نێزیكى ئانكو ل سالا 2020پروژه دێ كه‌ڤیته دوارێ بجهئینانێ دا.
