بو دووڤ وچون چاره‌سه‌ركرنا ئالوزى وئاریشێن ئه‌ردێ برا مه‌سیحیا ل ده‌ڤه‌را سه‌رسنكێ ئه‌ڤرۆ پشتى نیڤرۆ رۆژا چارشه‌مبى 11/ 5/2022 به‌رێزان ئانو جه‌وهه‌ر وه‌زیرێ ڤه‌گوهاستن وگه‌هاندنێ سه‌روكێ لیژنا بلند یا چاره‌سه‌ركرنا ئاریشێن ئه‌ردێ مه‌سیحیا و د.عه‌لى ته‌ته‌ر پارێزگارێ دهۆكێ وشمعون شلیمون جێگرێ پارێزگارێ دهۆكێ وعبدالره‌حمان بێلاڤ سه‌روكێ لیژنا وه‌زاره‌تا نافخویى بو چاره‌سه‌ركرنا ئالوزى وئاریشێن برا مه‌سیحیا سه‌را گوندێ باده‌ره‌شكێ ل ناوچه‌داریا سه‌رسنكێ دا ژلایێ ده‌ڤه‌ردارێ ئامێدیێ وقه‌شێ ده‌ڤه‌رێ وجڤات ورى سپیێن گوندێ ناڤبرى پێشوازى لێ هاته كرن.
دكۆمبوونه‌كێدا به‌حسێ وان ئالوزى وئاریشێن دوهى ل سه‌ر ئه‌ردێ چاندنێ چێبوین دناڤبه‌را خوجهێن گوندێ باده‌ره‌شكێ ولایه‌نه‌كێ دیێ ده‌ڤه‌رێ وئه‌و پێرابونێن یاسایى وئیدارى یێن هه‌مبه‌ر هه‌ردوو لا هاتینه وه‌رگرتن هاته كرن.
سه‌روكێ لیژنا بلند یا چاره‌سه‌ركرنا ئاریشێن ئه‌ردێ مه‌سیحیا و پارێزگارێ دهۆكێ وسه‌روكێ لیژنا وه‌زاره‌تا نافخویى په‌یڤێن خو پێشكشكرن وته‌كه‌زكرن كو ئه‌و ئالوزیێن چێبوین رودانه‌كا ب شه‌رچونێ بوو دناڤبه‌را دوو هاولاتیان دا وئێكسه‌ر باره‌گایێ سه‌روك بارزانى وسه‌روكێ هه‌رێمێ وسه‌روكێ جڤاتا وه‌زیران لایه‌نێن په‌یوه‌ندیدار راسپاردینه ولیژنه‌كا بلند ل سه‌ر ئاستێ وه‌زاره‌تا نافخویى هاتیه پێك ئینان وهه‌موو پێرابونێن یاسایى هه‌مبه‌ر هه‌ردوو لایه‌نا هاتینه وه‌رگرتن بو چاره‌سه‌ركرنا بابه‌تى .
پارێزگارێ دهۆكێ دوپاتكر كو ل دووڤ راسپاردێن سه‌روك بارزانى وسه‌روكێ هه‌رێمێ وسه‌روكێ حكومه‌تا هه‌رێما كوردستانێ ئه‌م ب هیچ شێوه‌كى رێكێ ناده‌ین زورى ل برایێن مه‌سیحى وچ پێكهاته‌یێن دى یێن هه‌رێما كوردستانێ بهێته كرن وهه‌موو پێرابونێن یاسایى هه‌مبه‌ر وى لایه‌نێ پێشێلكارى كرین دێ هێنه وه‌رگرتن ویاسا دێ رێیا خو یا راست گریت ولیژنه هاتینه پێك ئینانێ وهه‌تا به‌رى ئێكى ته‌موزێ ئه‌نجام دێ ده‌ركه‌ڤن ومافێ هه‌ر لایه‌كى دێ هێته دیاركرن وپاراستن.
پاش قه‌شێ ده‌ڤه‌رێ وروسپى ونونه‌رێن گوندى رونكرن دانه سه‌ر رودانا چێبوى وسوپاسیا پارێزگارێ دهۆكێ وده‌ڤه‌ردار وهه‌موو لایه‌نان كر كو نه‌هێلا ئاریشه پتر به‌رفره‌هببیت وهه‌موویان داخازكر كو ئاریشه ل دوڤ یاسایێن حكومه‌تا كوردستانێ بهێنه چاره‌سه‌ركرن وهه‌موویان ته‌كه‌زى ل سه‌ر پێكڤه ژیانێ وبرایه‌تیێ كر.
