بو دووڤ چونا ره‌وشا ئاوارێن شنگالێ ئه‌وێن ل ڤان رۆژا ده‌ڤه‌رێن خو بجه هێلاین وقه‌ستا كه‌مپێن پارێزگه‌ها دهۆكێ كرین ئه‌ڤرۆ ئێڤارى رۆژا پێنچ شه‌مبى 5/ 5/2022 به‌رێز د.عه‌لى ته‌ته‌ر پارێزگارێ دهۆكێ سه‌را كارگێریا كه‌مپا خانكێ یا ئاواره‌یێن شنگالێ دا ژلایێ پیر ده‌یان رێڤه‌به‌رێ كوچ وكوچبه‌رێن پارێزگه‌هێ وبه‌رسڤدانا قه‌یرانان وكارگێریا كه‌مپێ پێشوازى لێ هاته كرن.
دهه‌ڤدیتنه‌كێدا به‌حسێ ره‌وشا وان ئاواران هاته كرن ئه‌وێن ژبه‌ر شه‌ر وئالوزیێن ڤێ دوماهیێ دناڤبه‌را هێزێن چه‌كدار ونه‌یاسایى وله‌شكرێ عیراقێ رۆوداین وبویه هوكار ژماره‌كا خێزانان ئاواره‌ى كه‌مپێن سنورێ پارێزگه‌ها دهۆكێ ببن.
پارێزگارێ دهۆكێ ته‌كه‌زكر كو ئاوارێن شنگالێ خه‌لكێ مه‌نه ویا دشیاندابیت دێ بو ئه‌نجامده‌ین وده‌ست خوشى ل رێڤه‌به‌ریا كوچ وكوچبه‌ران وبه‌رسڤدانا قه‌یرانان وده‌زگه‌هێ خێر خازێ بارزانى وهێزێن ئێمناهیێ ولایه‌نێن په‌یوه‌نداركر كو ب ئه‌ركێ خو رابوینه وجه وپێدڤیێن ناڤ مالێ بو ئاواره‌یان دابینكرینه.
هه‌روه‌سا داخاز ژرێكخراوێن یو ئێن ومروڤایه‌تى وخێرخاز كر كو ب ئه‌ركێ خو رابن وهاریكاریا ئاواره‌یان بكه‌ن ودیاركر كو هێزێن شه‌ركه‌ر بلا شه‌رێ خو ڤه‌گوهێزێنه وان جهێن ژێ هاتین و خه‌لكێ سڤیل نه‌كه‌نه ئارمانج ورێك بهێته دان ئیدارا شه‌رعى یا شنگالێ خزمه‌تا شنگالیا بكه‌ت وبه‌رهه‌ڤیا حكومه‌تا هه‌رێمێ وپارێزگه‌هێ نیشان دا بو هه‌ر هاریكاریه‌كێ.
پاش پارێزگارێ دهۆكێ گه‌ریانه‌ك لناڤ كه‌مپێ كر وژنێزیك سه‌حكره ره‌وشا وان خێزانان ئه‌وێن نوو ئاواره‌بوین وپروسا به‌لاڤكرنا ئاهێن خارنێ ل سه‌ر وان.
هه‌ژى گوتنێ یه دماوێ سێ چار رۆژێن ده‌ربازبوى دا پتر ژ(1700) خێزانا ئانكو پتر ژ(10) هزار كه‌سا ژ خه‌لكێ شنگالێ ئاواره‌بوینه وپتریا وان ل كه‌مپێن خانكێ ل دهۆكێ وچه‌م مشكو ل زاخو هاتینه ئاكنجیكرن.
