ئه‌ڤرو سپێدێ 31-3-2021به‌رێز د.على ته‌ته‌ر پارێزگارێ دهۆكێ سه‌رپه‌رششتیا كۆمبوونا ژۆرا ئوپه‌راسیونا ل پارێزگه‌هێ كر .
دكۆمبوونێدا به‌حسێ به‌ڵاڤبونا بله‌ز یا نه‌خوشیا ڤایروسێ كورونا وكارتێكرنا وێ لسه‌ر ته‌ندورستیا گشتى یا هاولاتیان و وبجهئینانا رێنمایێن به‌یانا (12) یا كۆمبوونا لیژنا بلند یا به‌رهنگاربونا كورونایێ ل هه‌رێما كوردستانێ ب گشتى هاته كرن.
پاش پارێزگارێ دهۆكێ دكونگره‌كێ رۆژنامه‌ڤانیدا گوت: مه وه‌كو ژورا ئوپه‌راسیونا ل پارێزگه‌ها دهۆكێ بریار دایه هه‌موو به‌ندێن به‌یانا (12) یا لیژنا بلندا به‌رهنگاربونا كورونایێ بجهبینین ودیاركر كو مه‌ترسیا نه‌خوشیا كورونایێ ب راگه‌هاندنا قه‌ده‌غه‌یا هاتن وچونێ بتنێ ناهێته دوركرن به‌لكو دڤێت ئه‌م هه‌موو هزر وبیرو تیتالێن خو ل دور ڤایروسى بگوهورین وب دورستى وب هشیارى سه‌ره‌ده‌ریێ دگه‌ل ڤێ نه‌خوشیێ بكه‌ن وهه‌موو رێنمایێن خو پارێزیێ بجهبینین وماسكا ب كاربیینین وخو ژخرڤه‌بون وكومبونان دوركه‌ین وهاتن وچونێن زێده وگه‌شت وسه‌ره‌دانا كێمكه‌ین.
هه‌روه‌سا دیاركر كو دڤێت حكومه‌ت وحزب وهاولاتى ژى هه‌موو چالاكیێن گشتى ونه‌پێدڤى وهه‌لكه‌فتێن خوش ونه‌خوش راگرن وهه‌موو لایه‌ن وده‌زگه‌هێن راگه‌هاندنێ ورێكخراوێن جڤاكێ سڤیل وسوشیال میدیا هشیاریا جڤاكى دناڤ خه‌لكیدا به‌ڵاڤكه‌ن ومه‌ترسیا كورونایێ دیاركه‌ن دا خه‌لكێ مه باشتر پێگیریێ ب رێنمایێن خو پاریزیێ بكه‌ت وسستى دبابه‌تیدا نه‌هێته كرن چونكو مه‌ترسیا كورونایێ ژ شه‌رێ داعش كێمتر نینه .
ل دوماهیێ پارێزگارێ دهۆكێ سوپاسیا خه‌لكێ پارێزگه‌هێ كر كو ل ڤان چه‌ند رۆژێن بورى باشتر پێگیرى ب رێنمایێن خو پارێزیێ كریه وخواست كو ژنوكه وێڤه پتر رێنماییێن خو پارێزیێ بجهبینن وخو وكه‌س وكارێن خو ژڤێ په‌تایێ ب پارێزن.
ژگرنكترین بریارێن لیژنا بلند یا به‌رهنگاربونا ڤایروسێ كورونایێ :-
قوتابخانه وپه‌یمانگه‌ه وزانكو هه‌موو دێ مینن دایخستى هه‌تا ده‌مه‌كێ دن.
هه‌موو كۆمبوون وخرڤه‌بوون یێن سیاسى وئاینى وجڤاكى ناهێنه ئه‌نجامدان وسه‌رپێچكار دێ هێنه سزادان.
بازار وهول ومول وماركێت ژده‌م ژمێر (9) شه‌ڤێ هه‌تا (6) سپێدێ دێ هێنه گرتن ژبلى نه‌خوشخانه وكلینیكێن نوشدارى دێ مینه ڤه‌كرى وئه‌ڤ بریاه ل 31-3-2021 دێ كه‌ڤیته دوارێ بجهئینانێدا وهه‌تا 10-4-2021 دێ یا به‌رده‌وامبیت.
گرێدانا ماسكا یا بزوریه وهه‌ر كه‌سێ پێگیریێ پێ نه‌كه‌ت ب (20,000) بیست هزار دینارا دێ هێته سزادان.
