ئه‌ڤرۆ به‌رى نیڤرۆ رۆژا دوو شه‌مبى 1/ 8/2022 به‌رێز د.عه‌لى ته‌ته‌ر پارێزگارێ دهۆكێ پێشوازیا به‌رێزان حسێن كه‌لارى رێڤه‌به‌رێ گشتى یێ كوچ وكوچبه‌ران وبه‌رسڤدانا قه‌یرانان ل وه‌زاره‌تا نافخویى وپیر ده‌یان جه‌عفه‌ر رێڤه‌به‌رێ كوچ وكوچبه‌ران ل پارێزگه‌هێ وستافێ كارى یێ هه‌ردوو رێڤه‌به‌ریا كر.
دهه‌ڤدیتنه‌كێدا به‌حسێ ره‌وشا ئاواره وپه‌نابه‌ران ل ناڤ وده‌رڤه‌ى كه‌مپان ل سنورێ پارێزگه‌هێ وئه‌و هاریكارى وخزمه‌تا بو دهێنه پێشكێشكرن وئاسته‌نگ وئاریشێن دهێنه پێش ب گشتى هاته كرن.
رێڤه‌به‌رێ گشتى یێ كوچ وكوچبه‌ران وبه‌رسڤدانا قه‌یرانان په‌سنا رۆلێ پارێزگارێ دهۆكێ وخه‌لكێ پارێزگه‌هێ ورێڤه‌به‌ر وكارمه‌ندێن كوچ وكوچبه‌ر وبه‌رسڤدانا قه‌یرانان ل دهۆكێ كر ل دور ئه‌و خزمه‌تا بو ئاواره وپه‌نابه‌ران دكه‌ن وهیڤى خاستن كو هه‌موو لایه‌ن پتر هاریكاربن كو باشتر خزمه‌تا وان بهێته كرن.
ژلایێ خوڤه پارێزگارێ دهۆكێ ده‌ستخوشى ل ستافێ كوچ وكوچبه‌ران كر وته‌كه‌زكر كو دڤێت هه‌موو لایه‌نێن په‌یوه‌ندیدار سه‌ره‌ده‌ریه‌كا مروڤایه‌تى وشارستانى دگه‌ل ئاواره وپه‌نابه‌ران بكه‌ن ورویێ جوانێ یێ خزمه‌تكرنێ نیشانى جڤاكێ ده‌وله‌تى ورێكخراوێن مروڤایه‌تى بده‌ن وپشته‌ڤانیا كارگێریا پارێزگه‌هێ دیاركر بو هه‌ر هاریكاریه‌كێ.
