ئه‌ڤرو سپێدێ 25 /12/2021 به‌رێز د.على ته‌ته‌ر پارێزگارێ دهۆكێ ودگه‌لدا چه‌ند كارگێر وئه‌ندامێن لقێ 9 یێ پارتى دیموكراتى كوردستان ورێڤه‌به‌رێ ناوچه‌داریا گرده‌سین سه‌را گوندێ (قوپك) ل ناوچه‌داریا گرده‌سین دا وپشكدارى درێ ورسمێن به‌هیا كه‌سو وكارێن پێشمه‌رگه (عزیر خدر) دا كرن كو هه‌ڤیژنا پێشمه‌رگێ ناڤبرى وچار كورێن وى د رودانه‌كا ژه‌هراویبونێ دا ب ئاگرێ ره‌ژیا په‌لا گیانێ خو ژده‌ستدابوون.
بڤێ هه‌لكه‌فتا دلته‌زین وخه‌مناك پارێزگارێ دهۆكێ بناڤێ خو وكارگێریا پارێزگه‌هێ وبناڤێ به‌رێز سه‌روكێ حكومه‌تا هه‌رێما كوردستانێ سه‌ره‌خوشى گه‌هاندنا پێشمه‌رگه عزیر خدر وكه‌س وكارێن وان وژخودێ خواست كو جهێ قوربانیا بكه‌ته به‌هه‌شتا به‌رین وسه‌بر وهه‌دارێ بده‌ته مالباتا وان.
پاش پارێزگارێ دهۆكێ بو ده‌زگه‌هێن راگه‌هاندنێ ئاخفت وگوت:براستى ئه‌ڤ رودانه یا دلئێشبو وهه‌موو خه‌لكێ كوردستانێ پێ ئێشاینه وبناڤێ خو وسه‌روك بارزانى وسه‌روكێ حكومه‌تا هه‌رێما كوردستانێ سه‌ره‌خوشى ل كه‌س وكارێن رودانێ كرن.
هه‌روه‌سا گوت: هنده‌ك لایه‌نان ئه‌ڤ رودانه بو خو ب ده‌لیڤه دیتى یه و كریه به‌هانه كو هێرشا بكه‌نه سه‌ر حكومه‌تا هه‌رێمێ وڤان رودانا بو مه‌ره‌مێن خو یێن سیاسى بكاربینن وته‌كه‌زكر كو ده‌مێ ئه‌ڤ رودانه په‌یدا دبن دڤێت هه‌موولایه‌ن دهاریكاربن وكارتێكرنا رودانێ ل سه‌ر كه‌س وكارێن قوربانیا سڤكه‌ن.
ژلایێ خوڤه پێشمه‌رگه عزیر خدر سوپاسیا سه‌روك بارزانى وسه‌روكێ حكومه‌تا هه‌رێمێ وپارێزگارێ دهۆكێ وهه‌موو لایه‌نان كر كو ب تێله‌فونێ وبئاماده‌بونێ پشكدارى دبه‌هیا وان دا كریه وخه‌ما وان سڤكریه.
ناڤێن قوربانیێن رودانێ كو ل سپێده‌یا رۆژا 23-12-2021گیانێ خو ژده‌ستداى ئه‌ڤه‌بوون(بلمس مسته‌فا – سعد عزیز- خه‌لات عزیز- موراد عزیز- ره‌وان عزیز)
