ئه‌ڤرۆ ئێڤارى رۆژا سێشه‌مبى 24 / كانوونا دووێ /2023 ل كوچكا مێهڤانداریا به‌رێز د.عه‌لى ته‌ته‌ر پارێزگارێ دهۆكێ پێشوازیا به‌رێز مه‌مه‌د مه‌ولود كونسلێ گشتى یێ وه‌لاتێ تركیا كر.
دهه‌ڤدیتنه‌كێدا به‌حسێ وێ تاوانا ل شه‌ڤا 18ل سه‌ر 19 ڤێ مه‌هێ دناڤبه‌را باژێرێن نسێبینێ ومێردینێ دا هه‌مبه‌ر هاولاتیێن سڤیل یێن پارێزگه‌ها دهۆكێ هاتیه ئه‌نجامدان وبویه ئه‌گه‌رێ شه‌هیدبونا پێنچ هاولاتیێن بێگونه‌ه وئه‌نجامێن دوماهیێ یێن ڤه‌كولینان ده‌رباره‌ى رودانانێ ب گشتى هاته كرن .
دته‌وه‌ركێ دى دا به‌حسێ په‌یوه‌ندیێن دوو قولى دناڤبه‌را هه‌رێما كوردستانێ و ده‌وله‌تا تركیا وچوانیا پێشئێخستنا ئاستێ وان په‌یوه‌ندیان دهه‌موو بواره‌كیدا هاته كرن.
پاش پارێزگارێ دهۆكێ وكونسلێ گشتى یێ وه‌لاتێ تركیا ب هه‌ڤرا پشكدارى دبه‌هیا هه‌ر پێنچ قوربانیێن رودانا مێردینێ دا كر ، كونسلێ تركیا سه‌رخوشیێن خو گه‌هاندنه هه‌ردوو خێزانا وژخودێ خواست كو جهێ قوربانیا بكه‌ته به‌هه‌شتا به‌رین وسه‌برو وهه‌دارێ بده‌ته ماڵباتێن وان.
هه‌روه‌سا گوت: ژبه‌ر ڤێ رودانێ ئه‌م گه‌له‌ك ب خه‌م كه‌تین وده‌زگه‌هێن په‌یوه‌ندیار چار كه‌س ل سه‌ر ڤێ كه‌یسێ گرتینه وڤه‌كولینێن هوور ل سه‌ر تاوانبارا دهێنه كرن وته‌كه‌زكر كو پشتى ڤه‌كولینێ تاوانبار ل دووف یاسایێن تركیا دێ گه‌هنه سزایێ خو ویاسا وعه‌داله‌ت دێ جهێ خو گریت .
هه‌روه‌سا نونه‌رێ هه‌ردوو بنه‌ماڵا یاداشته‌ك دا ده‌ستێ كونسلێ تركیا وخواست كو هه‌ردوو حكومتێن هه‌رێما كوردستانێ وحكومه‌تا تركیا ب هه‌ڤرا كاربكه‌ن وڤه‌كولینێن رژد بكه‌ن وراستیا كه‌یسێ بهێته ئاشكراكرن وتاوانبار بهێنه سزادان ومافێ قوربانیا نه‌هێته به‌رزه‌كرن.
ژلایێ خوڤه پارێزگارێ دهۆكێ ته‌كه‌زكر كو سه‌روك مسعود بارزانى وسه‌روكێ هه‌رێمێ وسه‌روكێ حكومه‌تا هه‌رێما كوردستانێ وهه‌موو لایه‌نێن په‌یوه‌ندیدار ب رژدى دووڤ چونا ڤێ كه‌یسێ دكه‌ن كو تاوانبار بهێنه دیاركرن وسزادان.
