ئەڤرۆ ئێڤارى رۆژا چارشەمبى 7/خزیرانێ /2023 ێ ل پانوراما ئازادى ل باژێرێ دهۆکێ بەرێز د.عەلى تەتەر پارێزگارێ دهۆکێ ب ئامادەبونا چەند رێڤەبەرێن پەیوەندیدار وکەس وکارێن رەڤاندنیا پێشوازیا وان شەش کچێن ئێزدى کر ئەوێن لڤان رۆژان ژدەستێن تیرورستێن داعش هاتینە رزگارکرن.
پارێزگارێ دهۆکێ دپەیڤەکێدا سوپاسیا رێزداران سەروک مەسعود بارزانى ونێچیرڤان بارزانى سەروکێ هەرێما کوردستانێ ومەسرور بارزانى سەروکێ حکومەتا کوردستانێ کر هەمبەر هەول وبزاڤێن وان یێن بەردەوام بو رزگارکرنا هەموو رەڤاندیێن ئێزدى و خوشحالیا خو دیارکر هەمبەر ئازادکرنا وان شەش کچان وپیروزباهیا کەس وکارێن وان کر وهیڤى خاستن رەڤاندیێن دى ژى ب زوترین دەم بهێنە رزگارکرن وب باوەشا خێزان وکەس وکارێن خو شادبن.
هەربڤێ هەلکەفتێ بەرپرسێ نڤێسینگەها رزگارکرنا رەڤاندیا ل دهۆکێ دپەیڤەکێدا سوپاسیا رێزداران سەروک بارزانى و سەروکێ هەرێما کوردستانێ و سەروکێ حکومەتا کوردستانێ وپارێزگارێ دهۆکێ کر بو ئازادکرنا رەڤاندیا وتەکەزکر کو هەول وبزاڤێن نڤێسینگەها رزگارکرنا رەڤاندیا دێ دبەردەوامبن هەتا هەموو رەڤاندى دهێنە رزگارکرن.
تێ زانین هەتا نوکە 3568 رەڤاندى ژکچ وژنێن ئێزدیان هاتینە رزگارکرن.
