ئه‌ڤرو سپێدێ 30-10-2018ل هولا كونفرانسان ب ئاماده‌بونا ژماره‌كا ماموستا وره‌وشه‌نبیر وقوتابیێن زانكویێ , زانكویا دهوك سه‌نته‌رێ بێشكچی بو ڤه‌كولینێن مروڤایه‌تی سمیناره‌ك بو به‌رێز فه‌رهاد ئه‌مین ئه‌تروشی پارێزگه‌رێ دهوكێ ل ژێر ناڤێ((پێشبینیێن ره‌وشا كابینا نوو یاحكومه‌تا عیراقا فیدرال)) ئاماده‌كر.
ل ده‌ستپێكێ پارێزگه‌رێ دهوكێ دیاركر كوپێشبینیێن ڤێ سمینارێ ده‌ربرینێ ژهزر بوچونێن من یێن كه‌سایه‌تی دكه‌ن وروناهی به‌ردانه سه‌ر ره‌وشا حكومه‌تا نوو یا عادل عبدالمهدی وگوت یا ب ساناهی نینه مروڤ ب شێت دیاركه‌ت كا ئه‌ڤ كابینه دێ یا سه‌ركه‌فتی بیت یان نه و ئاماژه دا نه‌خشێ سیاسی ل په‌رله‌مانێ عیراقێ كو هه‌موو ددابه‌شكرینه ل سه‌ركوتلێن كوردی وسنی وشیعه‌یان وهه‌موو دبه‌ربه‌ڵاڤن ونه‌شیاینه ببنه كوتلێن ئێكگرتی .
هه‌روه‌سا ئاماژه دا ره‌وشا هه‌رێما كوردستانێ وباده‌كێن ماینه هلاویستی دگه‌ل حكومه‌تا فیدرال ئه‌وژی بابه‌تێ سنورێن هه‌رێمێ ومادێ 140 وبابه‌تێ پترول وسامانێن سروشتی وبابه‌تێ پێشمه‌رگه‌ی وبابه‌تێ دام وده‌زگه‌هێن فیدرالی وكارناما كابینا نوو یا حكومه‌تا فیدرال هه‌مبه‌ر هه‌رێمێ .
هه‌روه‌سا ئاماژه دا زالبونا رولێ شیعا ل سه‌ر ده‌ست نیشانكرنا سه‌روكێ په‌رله‌مانی وسه‌روك كوماری وسه‌روك وه‌زیران وڤالاتیا هه‌شت وه‌زاره‌تان كو هێشتا نه‌هاتینه پركرن وئه‌ڤ چه‌نده وێ نیشان دده‌ن كو حكومه‌ته‌كا لاوازه دناڤ خودا هه‌یه لێ لایه‌نێ شیعی دڤێت دیاركه‌ت كو ئه‌ڤ حكومه‌ته دێ یا ب هێزبیت.
پارێزگه‌رێ دهوكێ ئاماژه دا خالێن لاوازیا سه‌روك وه‌زیران كو وی بخو چ كوتله ولایه‌ن نینن پشته‌ڤانیا وی بكه‌ن وئه‌و بخو ژی نه‌كه‌سه‌كێ تكنوقراته هه‌روه‌سا ئه‌وێن بوینه وه‌زیر ژی گه‌لك ژوان نه دبه‌رنیاسن ودێ كارتێكرنێ ل كابینا نوو كه‌ن.
فه‌رهاد ئه‌مین ئاماژه دا به‌رنامێ حكومه‌تا نوو وگوت: گه‌ل تشت دوباره هاتیه دارشتن وره‌ڤین ژگه‌له‌ك ئاریشێن حكومه‌تا فیدرال وحكومه‌تا هه‌رێمێ كریه وچ چاره‌سه‌ری بو نه داناینه‌وچ كار بو بابه‌تێ پێشمه‌رگه‌ی نه‌كریه وگرنگی پێ نه‌هاتیه دان وبه‌حسێ ته‌وافق وشه‌راكه‌تا سیاسی ومادێ 140 نه‌كریه وپه‌یڤا فیدرالی كێم هاتیه ب كارئینان وگه‌له‌ك كێم وكاسی دبه‌رنامه‌ی دا هه‌نه .
هه‌روه‌سا به‌حسێ خالێن ئیجابی یێن كه‌سایه‌تیا عادل عبدالمهدی وبه‌رنامێ كابینا نوو ژی كرن كو كه‌سه‌كێ باشه ودوستێ كوردا یه وب تایبه‌تی یێ سه‌روك بارزانی وكارنامێدا هاتیه كو دێ سازیێن دستوری یێن حكومه‌تا فیدرال ب هێزكه‌ن ودستوری په‌یره‌وكه‌ن وئاریشێن هلاویستی یێن حكومه‌تا فیدرال وحكومه‌تا هه‌رێمێ چاره‌سه‌ركه‌ن.
وگوت: ناڤه‌روكا كارناما حكومه‌تا نوو بێ ئومێدیێ نیشان ده‌ت لێ به‌لكی كه‌سایه‌تیا باش یا سه‌روك وه‌زیری باشیێ بو عیراقێ وكوردستانێ په‌یداكه‌ت.
ل دوماهیێ گوت: دڤێت ئه‌م كورد پتر ناڤ مالیا خو رێكبێخین وب ئێك ده‌نگ به‌ره‌ڤانیێ ژمافێن خه‌لكێ هه‌رێما كوردستانێ بكه‌ین.
پاش ده‌رگه‌هێ دان وستاندنێ هاته ڤه‌كرن وچه‌ندین پسیار هاتنه ئاراسته‌كرن وبه‌رسڤ ل سه‌ر هاتنه دان.
