محمد سعید سلیمان ناڤدار ب سعید گاباری ل 23/3/1956 ل گوندێ (خربێ کەژێ) سەر ب باژێرێ حەسەکە ڤە ژ دایك بویە .
سەرەرای کو ژ دیتنا چاڤا بێ بەهر ببو لێ نە بینیا وی نە بو رێگر کو شیا ل سالا 1969 دەست ب هونەری بکەت و هەر دەسپێکێ هەستا نەتەوایەتی یا بهێز بو لدەف وی و ب سترانا ئەی (بلبلێ دلشادی) ناڤدار ببو و بەرەبەرە سالانە بەرهەمێن هونەری ئافراندن کو د ئەنجام دا بو ئێك ژ ستوینێن سەرەکی یێن هونەرێ کوردی ل روژ ئاڤا مینا سعید یوسڤ و محمد شێخو و محمود عزیز شاكر و…هتد
سعید گاباری شارەزایەکا باش هەبو د ژەنینا ئامیرێن وەتەری دا مینا بزق و عود و کەمانجێ هەروەسا دەنگەگێ خوش و کاریگەر هەبو و شارەزایەکا باش و بەرفرهـ هەبو د کەلەپور و ستران و هونەرێ هەمی پارچێن کوردستانێ دا و هوزان و ئاوازێن سترانێ ددانان هەروەسا سترانێن رەخنەی و مەنەلوجی د ستراندن ب روح سڤکی لەو هاتە ناڤ لێ ئێنان ب فەرهەنگا کوردی یا هونەری
سعید گاباری خەباتەکا هونەری و نەتەوایەتی یا دیر و درێژ هەبو و حەتا روژێن دوماهێکا ژیانا خو یێ بەردەوام بو ب رێکا لایڤا و راستەوخو سەر هێل بو دگەل جەماوەر و حەژێکەرێن دەنگێ خو.
مخابن ل ڤان روژا ژ نیشكڤە توشی ئێشا گران دبیت و پشتی هەڤرکیەکا دژوار د ماوەکێ کورتدا ل 4/5/2020 وەغەرا دوماهیکێ کر و لسەر داخاز و وەسیەتا وی ل گورستانا نێزیك مالا وی ل مەلا ئومەر سەر ب پارێزگەها هەولێرێ ڤە هاتە ڤەشارتن لێ دەنگ و ساز و ئاواز و هونەرێت وی هەر د ساخن و نا مرن و بوشاتیەکا مەزن پر دکەن د پێڤاژویا هونەرێ کوردی دا
هزار سلاڤ ل گیانێ پاقژێ هونەرمەندێ نەمر سعید گاباری بن و خودێ سەبرێ بدەتە کەسو کارێن وی و هەمی حەژێکەرێن دەنگ و هونەرێ وی و جهێ وی بەهەشتا بەرین بیت
انا لله و انا الیه راجعون
پارێزگارێ دهوکێ
فەرهاد ئەمین ئەترووشی
