پارێزگه‌رێ دهۆكێ راگه‌هانده‌ك ب هه‌لكه‌فتا ژ دایكبوونا بارزانیێ نه‌مر و ده‌ربازبوونا 29 سالان ل سه‌ر سه‌رهلدانا دهۆكێ و بیره‌وه‌ریێن ئادار و نه‌ورۆزێ به‌لاڤكر، ئه‌ڤه ده‌قێ وێ یه:
ب ناڤێ خۆ و كارگێریا پارێزگه‌ها دهۆكێ هه‌ردو هه‌لكه‌فتێن نه‌ته‌وه‌ی، ژ دایكبوونا بارزانیێ نه‌مر و ده‌ربازبوونا 29 سالان ل سه‌ر سه‌رهلدانا باژێرێن دهۆك و سێمێلێ ل وه‌لاتیێن كوردستانێ ب گشتی و یێن پارێزگه‌ها دهۆكێ ب تایبه‌تی پیرۆز دكه‌م، سه‌رهلدان ئێكه ژ سه‌روه‌ریێن مه‌زنێن دیرۆكا گه‌لێ مه و ده‌ربڕینا باوه‌ری و ڤیانا گه‌لێ كوردستانێ بوو بۆ ژیانه‌كا ئازاد و سه‌رفرازانه و ره‌تكرنا سته‌م و زۆرداریێ بوو.
ئه‌ڤ هه‌یڤه یا پڕه ژ بیره‌وه‌ریێن خۆش و نه‌خۆش یێن گه‌لێ مه و هه‌موو ئاسته‌نك و نه‌خۆشی ب سه‌ركه‌فتیانه یێن ده‌ربازكرین، نوكه ژی كو جیهان هه‌موو یا ل بن مه‌ترسیا به‌لاڤبوونا په‌ژیكا كۆرۆنایێ و ل كوردستان و پارێزگه‌ها دهۆكێ ژی پێرابوونێن توند بۆ رووبرووبوونا ڤی ڤایرۆسی گرتینه به‌ر و ب ئانه‌هیا خودێ و هاریكاری و پێگیریا وه‌لاتیان ب رێنمایان دێ ژ مه‌ترسیا ڤی ڤایرۆسی قورتال بین و ژیان ب ره‌نگه‌كێ نۆرمال جاره‌كا دی دێ برێڤه چیت.
دوباره ئه‌ڤ هه‌ردو هه‌لكه‌فتێن نه‌ته‌وه‌ی ل هه‌موو لایه‌كی پیرۆز بن
فه‌رهاد ئه‌مین ئه‌ترووشی
پارێزگه‌رێ دهۆكێ
14ـ3ـ2020
