ئه‌ڤرو سپێدێ 23-6- 2020 به‌رێز فه‌رهاد ئه‌مین ئه‌تروشى پارێزگه‌رێ دهوكێ سه‌ر رێڤه‌به‌ریا پولیسێن دهوكێ دا ژلایێ لیوا تارق احمد رێڤه‌به‌رێ فه‌رمانگه‌هێ ورێڤه‌به‌رێ پولیسێن هاتن وچونێ وئه‌فسه‌رێن هه‌ردوو رێڤه‌به‌ریا پێشوازى لێ هاته كرن.
پاش رونشتنه‌ك دگه‌ل رێڤه‌به‌ر وپله‌دارێن هه‌ردوو رێڤه‌به‌ریا هاته سازكرن ل به‌راهیێ لیوا تارق بخێر هاتن وسوپاسیا پارێزگه‌رێ دهوكێ كر ل دور ئه‌و پشته‌ڤانى وهاریكاریا جه‌نابێ وى بو هه‌موو ده‌زگایێن ئێمناهیێ نه‌خاسمه بو رێڤه‌به‌ریێن پولیسا ل ڤان شه‌ش سالێن ده‌ربازبوى كرى وئه‌ڤ پشته‌ڤانیه بویه هوكارێ پێشكه‌تنا كارێ ده‌زگایێن ئێمناهیێ سه‌ره‌رایى هه‌بونا چه‌ندین قه‌یرانێن ئێك ل دوڤ ئێك .
پاش پارێزگه‌رێ دهوكێ دپه‌یڤه‌كێدا بناڤێ كارگێریا پارێزگه‌هێ وخه‌لكێ پارێزگه‌هێ سوپاسى وده‌ست خوشى ل هه‌موو رێڤه‌به‌ر وئه‌فسه‌ر وپله‌دارێن هێزێن ئێمناهیێ كر وگوت: سه‌ربلندم كو ل شه‌ش سالێن بورى مه هه‌ڤرا كار وخزمه‌تكریه وئه‌م شیاینه ره‌وشا گشتى یا ته‌ناهیا خه‌لكێ خو ب پارێزین .
هه‌روه‌سا گوت: گوهورین دناڤ ده‌زگه‌هێن حكومه‌تێ دا تشته‌كێ ئاسایى یه وئارمانج ژێ ئه‌وه خزمه‌ت باشتر بهێته كرن وته‌كه‌زكر كو هه‌ر بریاره‌كا ژسه‌ركردایه‌تیا كوردستانێ ده‌رگه‌ڤیت ئه‌م دێ پێگریێ پێ كه‌ین .
پارێزگه‌رێ دهوكێ دیار كر كو ل ڤان شه‌ش سالێن خزمه‌تكرنێ گه‌له‌ك قه‌یران وئاسته‌نگێن جورا وجورا ودژوار هاتنه پێش لێ كار وخزمه‌ت ل دوڤ شیانێن به‌رده‌ست هاتنه ئه‌نجامدان وهنده‌ك كار وخزمه‌ت دبه‌رچاڤن وهنده‌ك ژى نه دبه‌رچاڤن وشانازیێ ب كار وێ خزمه‌تێ دبه‌م یا من ل ڤان شه‌ش سالا پێشكێشكرى .
ل دوماهیێ داخاز ژهه‌موو لایه‌ن وهێزێن ئێمناهیێ كر كو هه‌موو دگه‌ل پارێزگه‌رێ نوو یێ پارێزگه‌ها دهوكێ دهاریكار وهه‌ڤكاربن بو خزمه‌تكرنا پاراستنا ته‌ناهیا خه‌لكێ ده‌ڤه‌رێ.
هه‌ژى گوتنێ یه هه‌ر ئه‌ڤرو سپێدێ پارێزگه‌رێ دهوكێ سه‌ره‌دانا دادگه‌ها دهوكێ كر بو ودگه‌ل سه‌روكێ دادگه‌هێ ودادوه‌ران كومببو وسوپاسیا كار وخزمه‌تا وان كر بو كو ل ڤان سالێن بورى هه‌موویان وه‌كو ئێك تیم خزمه‌تێن دادوه‌رى پێشكێشى خه‌لكێ پارێزگه‌هێ كرینه.
ول روژا 22-6-2020 پارێزگه‌رێ دهوكێ دگه‌ل رێڤه‌به‌رێن ناحیێن سنورێ قه‌زایێن پارێزگه‌هێ كومببو وسوپاسیا وان كربو ل دور ئه‌و كارێن ل شه‌ش سالێن ده‌ربازبوى پێشكێشى وه‌لاتیان كرین.
