ب هه‌لكه‌فتا جه‌ژنا ژدایك بونا حه‌زره‌تا عیسایێ مه‌سیح وب مه‌ره‌ما پیروزباهیكرنا جه‌ژنێ ل برایێن مه‌سیحى ئه‌ڤرو سپێدێ 25/ 12/2019 به‌رێز فه‌رهاد ئه‌مین ئه‌تروشى پارێزگه‌رێ دهوكێ سه‌را مه‌ترانیا كلدانیا ل دێرا به‌رانى دا ژلایێ مه‌تران ره‌بان مه‌تران دهوك وده‌روبه‌ران وكه‌سایه‌تیێن ئاینى پێشوازى لێ هاته كرن .
پاش پارێزگه‌رێ دهوكێ سه‌را مه‌ترانیا ئاشوریان ل دهوك دا ژلایێ مه‌تران مار ئیسحاق مه‌ترانێ ئاشوریا ل دهوك ونه‌ینه‌وا وروسیا وئه‌رمینیا وكه‌سایه‌تیێن ئاینى پێشوازى لێ هاته كرن.
دڤان سه‌ره‌دانان دا پارێزگه‌رێ دهوكێ پیروزباهیێن جه‌ژنێ گه‌هاندنه هه‌موو مه‌سیحیێن پارێزگه‌هێ وكوردستانێ وعیراقێ وجیهانێ وخواست هه‌ر سال ئه‌ڤ جه‌ژن وهه‌لكه‌فته یێن هه‌موو ئول ونه‌ته‌وه‌یان ب خێرو وخوشى وئارامى وته‌ڤایى بهێنه گێران .
هه‌ردوو مه‌ترانێن به‌رێز په‌سنا به‌رقراربونا ئه‌من وئاسایشێ وپێكڤه ژیانێ ل ده‌ڤه‌رێ كر وخواستن كو روژ بو روژێ گیانێ لێبورین وهه‌ڤدوو قه‌بولكرنێ دناڤبه‌را هه‌موو پێك هاته‌یێن كوردستانێ ب گشتى وپارێزگه‌ها دهوكێ ب تایبه‌تى بهێته موكومكرن.
هه‌ر بڤێ هه‌لكه‌فتێ پارێزگه‌رێ دهوكێ دپه‌یامه‌كێدا بو ده‌زگه‌هێن راگه‌هاندنێ گوت: ئه‌م هاتینه هه‌ردوو مه‌ترانیا ب مه‌ره‌ما گه‌هاندنا پیروزباهیێن جه‌ژنێ وبناڤێ خو وكارگێریا پارێزگه‌ها دهوكێ پیروزباهیێ ل هه‌ردوو مه‌ترانان وب رێكا وان ل هه‌موو مه‌سیحیێن پارێزگه‌هێ وكوردستانێ وعیراقێ وجیهانێ دكه‌ین ، گێرانا ئاهه‌نگێن جه‌ژنێ ب ره‌نگه‌كێ ئارام هه‌تا ده‌رنگى شه‌ڤ نیشانا وێ چه‌ندێ یه كو ئه‌من وئاسایش ل سنورێ پارێزگه‌هێ یا به‌رقراره ،مه‌ژى وه‌كو كارگێریا پارێزگه‌هێ پلانا خو یا ئه‌منى بو گێرانا جه‌ژن وئاهه‌نگێن سه‌رێ سالێ یا به‌رهه‌ڤكرى وهیڤى خاستن كو سالێن خوشتر وئارامتر ب سه‌ر ده‌ڤه‌رێ دا بهێن وباشتر خزمه‌تا پێكهاتێن كورستانێ بهێته كرن.
