ئه‌ڤرو سپێدێ 19-3-2020 به‌رێز فه‌رهاد ئه‌مین ئه‌تروشى پارێزگه‌رێ دهوكێ دگه‌لدا جه‌هوه‌ر على قایمقامێ قه‌زا دهوكێ وچه‌ند رێڤه‌به‌رێن فه‌رمانگه‌هێن په‌یوه‌ندیدار سه‌را تاخێ سه‌رهلدان دا وژنێزیك سه‌حكره وان زه‌ره‌ر و زیانێن گه‌هشتینه هاولاتیان.
دكونگره‌كێ روژنامه‌ڤانیدا پارێزگه‌رێ دهوكێ گوت: نوكه ئه‌م یێ ل تاخێ سه‌رهلدان ئه‌و جهێن زه‌ره‌رێن مه‌زن گه‌هشتینه هاولاتیان ژئه‌نجامێ وان بارانێن بوش یێن شڤێدى هاتین كو دماوێ 48ده‌م ژمێران دا پتر ژ(160)ملمان باران هاتینه وبویه هوكار كو لافاو ل ڤى تاخى وگه‌له‌ك تاخێن دى ل دهوكێ هه‌روه‌سا زیان گه‌هشتیه خه‌لكى ل گه‌له‌ك قه‌زایێن پارێزگه‌هێ ب مخابنیڤه هنده‌ك وه‌لاتیان گیانێ خو ژده‌ست دایه زیان گه‌هشتیه خانیا وترومبێل وجهێن بازرگانى ودوكانا وپره‌ك ل سنورێ قه‌زا سێمێلێ دناڤبه‌را پارێزگه‌ها دهوكێ وموسل دا ژكاركه‌فتیه ئه‌م هاتینه دا ژنێزیك وان زیانا ببین یێن گه‌هشتینه هاولاتیان هه‌ر وه‌سا ل سه‌ر ئاستێ هه‌موو قه‌زایان ژى لیژنه هاتینه پێك ئینان بو دیاركرنا زه‌ره‌ر وزیانا ودێ ب راپورته‌كا به‌رفره‌ه ئاراسته‌ى حكومه‌تا كوردستانێ وسه‌روكاتیا جڤاتا وه‌زیران كه‌ین بو وێ یه‌كێ بهێنه قه‌ره‌بوكرن هه‌رچه‌نده نوكه چه‌ند قه‌یران په‌یدابوینه وبهایێن په‌ترولێ زور دا كه‌فتینه وكارتێكرنێ ل بودجا هه‌رێمێ دكه‌ت وعیراق ژى بودجێ وه‌كو پێدڤى فرێناكه‌ت وزیده‌بارى په‌یدابونا ڤایروسێ كورونا .
پارێزگه‌رێ دهوكێ داخاز ژخه‌لكێ زیان به‌خش كر كو بێهنا خو ل سه‌ر بویه‌را نه‌چاڤه‌رێكرى فره‌هبكه‌ن چونكه ئه‌ڤه كاره‌ساتێن سروشتى نه ونه‌ب ده‌ستێن مروڤانه وته‌كه‌زى ل تیمێن خزمه‌تكارى كو هه‌ر ئه‌ڤرو شونوارێن هه‌موو لافاوا بهێنه پاقژكرن ورێك بهێنه‌ڤه‌كرن.
سه‌باره‌ت په‌یدابونا حاله‌ته‌كێ ڤایروسێ كورونا پارێزگه‌رێ دهوكێ گوت: هه‌رچه‌نده ئه‌ڤه ده‌مه‌كێ درێژه مه پێرابونێن توند وه‌رگرتینه وچه‌ند جارا تێست ژى ل سه‌ر وى كه‌سێ هلگرێ ڤایروسى هاتینه كرن لێ دیاربو كو هلگرێ ڤایروسێ كورونا یه ولدوڤ پێزانینا ئه‌و كه‌س ژئه‌لمانیا هاتیه پارێزگه‌هێ وئه‌وى كه‌سى پێگرى ب رێنمایێن ته‌ندورستى وحكومه‌تێ نه‌كریه وپێدڤى ئه‌و كه‌س ویێن هاریكارى وكونتاك دگه‌ل كرى ب توندى بهێنه سزادان).
هه‌ژى گوتنێ یه ل دوڤ پێزانینا ئه‌وزیانێن ژئه‌نجامێ باران وئاڤ رابونا په‌یدابوین ل سه‌رانسه‌رى پارێزگه‌هێ بڤى ره‌نگى بوینه(دوو كه‌سا گیانێ خو ژده‌ست دایه 48ترومبێل ل تاخێ سه‌رهلدان ژكاركه‌فتینه و13ترومبێلێن دى ل جهێن جودا ژكاركه‌فتینه وزیان گه‌هشتینه 400ماڵا و100دوكان وجهێن بازرگانى و30 سه‌رێن په‌زى هاتینه كوشتن ).
