ئه‌ڤرو ئێڤارى 18-3-2020 ب سه‌رپه‌رشتیا به‌رێز فه‌رهاد ئه‌مین ئه‌تروشى پارێزگه‌رێ دهوكێ كومبونا ژورا عه‌مه‌لیاتا یا تایبه‌ت ب به‌رهنگاریا ڤایروسێ كورونا هاته ئه‌نجامدان.
دكومبونێدا ب ئاماده‌بونا به‌رێز فه‌هیم عبدالله سه‌روكێ جڤاتا پارێزگه‌ها دهوكێ گه‌نگه‌شێن تێر وته‌سه‌ل ل سه‌ر ئاڤ رابونێن ل سه‌رانسه‌رى ده‌ڤه‌رێ په‌یدابوین وزه‌ره وزیانێن گه‌هشتینه وه‌لاتیان و نوترین پێشهاتێن به‌لاڤبونا ڤایروسێ كورونا ل ده‌ڤه‌رێ وجیهانێ ودوڤ چون وبجهئینانا رێنما وبریارێن كومبونێن به‌رى نوكه ل دور بابه‌تى هاتینه ده‌رئیخستن هاته‌كرن .
هه‌روه‌سا دكومبونێدا به‌حسێ بریارا وه‌زاره‌تا نافخویى ژبو راگرتنا گشتى یا هاتن وچونێ (منع التجول) ل هه‌موو باژێر وباژێركا هاته كرن.
دكونگره‌كێ روژنامه‌انیدا پارێزگه‌رێ دهوكێ گوت: ئه‌ڤرو بارانێن بوش ل سه‌رانسه‌رى پارێزگه‌هێ هاتینه وزیانێن مه‌زن گه‌هاندینه هه‌موو ده‌ڤه‌رێ وته‌رش وكه‌والى وگوت ئه‌ڤرو وزیرێ نافخویى یێ حكومه‌تا كوردستانێ بریارا راگرتنا هاتن وچونێ ل هه‌موو كوردستانێ ده‌ركریه وئه‌م ژى وه‌كو پارێزگه‌ها دهوكێ دێ ژده‌م ژمێر (12) ئه‌ڤ شه‌ڤه بجه ئینین وهاتن وچون ل ناڤا هه‌موو قه‌زا وناحیا وباژێركا دێ هێته راگرتن وداخاز ژهه‌موو وه‌لاتیێن پارێزگه‌هێ كر كو ل سه‌ر خوبن وكا چاوا به‌رى نوكه پێگریى ب رێنما وبریارێن حكومه‌تا كوردستانێ كریه پێگریێ بڤێ بریارێ ژى بكه‌ن وخو زاروك وخێزانێن خو ژڤێ نه‌خوشیێ ب پارێزن .
هه‌روه‌سا گوت: خه‌لك دشێت ژسه‌عه‌ت (ئێكى شه‌ڤێ هه‌تا شه‌شى سپێدێ) سه‌ره‌دانا ماركێت وجهێن تایبه‌ت بكه‌ن بو دابینكرنا پێدڤیێن ژیانێ وخواست كو هاولاتى هه‌موو دهاریكاربن دگه‌ل ژورا عه‌مه‌لیاتا وده‌زگه‌هێن ئێمناهیێ دا ره‌وشا گشتى بهێته پاراستن .
وگوت: ده‌رمانخانه وفرنێن سه‌مونا وناپێژیى وبازارێن ئه‌رزاقێ هشك دفروشن وگوشت فروش وئه‌و جهێن خزمه‌تكارى یێن به‌رى نوكه رێك پێ هاتیه دان ناهێنه گرتن وفه‌رمانگه‌هێن خزمه‌تكارى دێ به‌رده‌وامبن ل سه‌ر خزمه‌تكرنێ وهاتن وچونا دبلوماتكار ورێكخراوێن مروڤایه‌تى وبزاڤا بازرگانى دێ یێ به‌رده‌وامبیت.
