ئه‌ڤرو سپێدێ 9/7/2020 به‌رێز د.على ته‌ته‌ر پارێزگه‌رێ دهۆكێ سه‌رپه‌رشتیا كۆمبوونا لیژنا بلند یا دووڤ چۆنا زێده‌گاڤیا كر.
دكۆمبوونێدا گه‌نگه‌شێن تێر وته‌سه‌ل ل سه‌ر یاسا ورێنما وبریارێن ژلایێ سازیێن حكومه‌تا هه‌رێما كوردستانێ ده‌ركه‌فتین ژبو تاپوكرنا خانیێن ب زێده‌گاڤى هاتینه ئاڤاكرن هاتنه كرن.
پارێزگه‌رێ دهوكێ دیاركر كۆ دڤێت سه‌ره‌ده‌رى ل دووڤ یاسا ورێنمایێن حكومه‌تا هه‌رێما كۆردستانێ ل گه‌ل هه‌ر زێده‌گاڤییه‌كێ بهێته كرن وقانون سه‌روه‌ربیت ونابیت چاڤ پوشى بهێته كرن وفشارێن چ كه‌س ولایه‌نان نه‌هێنه قه‌بولكرن وهه‌موو زێده‌گاڤى ب دادى وراستگویێ ول دووڤ قانونێ بهێنه چاره‌سه‌ركرن وتاپوكرن .
دكۆنگره‌كێ رۆژنامه‌ڤانیدا پارێزگه‌رێ دهۆكێ دیاركر كۆ هه‌ر خانییه‌كێ ژرێكه‌فتى 13-3-2018ب زێده‌گاڤى هاتیه ئاڤاكرن بلا خودانێن وان سه‌ره‌دانا یه‌كێن ئیدارى ولیژنێن زێده‌گاڤیا ل قایمقامیێن قه‌زا بكه‌ن وده‌لیڤه بۆ هه‌یه هه‌تا روژا 10-10-2020 داخازیێن خو پێشكێشبكه‌ن بو برێڤه‌برنا ماملێن تاپوكرنێ .
هه‌روه‌سا داخاز ژ سازیێن په‌یوه‌ندیدار كر كو هه‌موو ئاسنكارى بو هاولاتیان دچارچوڤێ قانون ورێنمایێن حكومه‌تا هه‌رێما كوردستانێ دا بهێنه كرن بو تاپوكرنا خانیێن ب زێده‌گاڤى هاتینه ئاڤاكرن وبلا یاسا سه‌روربیت بو چاره‌سه‌ركرنا هه‌ر كه‌یسه‌كێ .
سه‌باره‌ت تاپۆكرنا خانیێن كومه‌لگه‌هێن زۆره مللى گۆت: نوكه ئه‌م یێ كارى ل سه‌ر بابه‌تێ وان ژى دكه‌ین و ب رێكێن قانونى دێ هێته چارسه‌ركرن وخه‌لكه‌كێ زۆر دێ مفاى ژێ وه‌رگریت.
لدووڤ ئامارێن نه‌فه‌رمى نێزیكى (25) هزار خانیێن زێده‌گاڤى ل سه‌رانسه‌رى پارێزگه‌هێ هه‌نه وپشتى یاسایا تاپوكرنێ دكه‌ڤیته دبیاڤێ بجهئینانێ دا ژماره‌كا زۆر یا خه‌لكى دێ مفاداربن وخانیێن وان دێ هێنه تاپوكرن.
