ئه‌ڤرو ئێڤارى 23-4- 2020 ل كوچكا مێهڤانداریا به‌رێز فه‌رهاد ئه‌مین ئه‌تروشى پارێزگه‌رێ دهوكێ دكونگره‌كێ روژنامه‌ڤانیدا ب ئاماده‌بونا ماجد سه‌ید صالح جێگرێ پارێزگه‌رێ دهوكێ ب وه‌كاله‌ت ورێڤه‌به‌رێ گشتى یێ ساخله‌میا دهوكێ ورێڤه‌به‌رێ هاتن وچونێ دیاركر كودكومبونه‌كا تایبه‌ت دا ئه‌وان ره‌وشا پارێزگه‌ها دهوكێ گه‌نگه‌شه‌كر ولدوڤ به‌یانا وه‌زاره‌تا نافخویى قه‌ده‌غه‌یا هاتن وچونێ ژسه‌عه‌ت (6ئێڤارى هه‌تا 12شه‌ڤێ) هه‌تا روژا 1-5-2020دێ یا به‌رده‌وامبیت وهه‌ر بریاره‌كا ژلایێ حكومه‌تا كوردستانێ و وه‌زاره‌تا نافخویى ل دور ڤایروسێ كورونا بهێته دان ئه‌م وه‌كو پارێزگه‌ه وژورا ئوپه‌راسیونا دێ پێگریێ پێ كه‌ین .
هه‌روه‌ساگوت: مه ئاماده‌باشى ل سه‌ر ئاستێ ژورا ئوپه‌راسیونێ كرینه كو پتر ئاسانكاریا بو هاولاتیان ئه‌نجامده‌ین وژیانا روژانه پتر ئاسایى ببیت وئه‌م چاڤه‌رێ ینه كو لسه‌ر ئاستێ قه‌زا به‌رهه‌ڤیا بكه‌ن بو دانانا به‌رنامێ قوناغا 7ێ وهه‌ر ده‌ما ئه‌و به‌رنامه به‌رهه‌ڤبو قوناغا نوو یا ئاسانكاریا دێ راگه‌هینین.
سه‌باره‌ت ته‌قه‌كرنا شڤێدى هاتیه كرن پارێزگه‌رێ دهوكێ گوت: به‌رى چه‌ند روژا مه گوتبو ئه‌م دگه‌ل گێرانا ئاهه‌نگێن سه‌ركه‌فتنێ نینین چونكو مه دیاركربو نه دوره هه‌ر چركه‌كێ كه‌یسه‌كا ڤایروسێ كورونا دیارببیت وته‌قه‌كرنا شڤێدى بدلێ مه نه‌بو وئه‌وێن ته‌قه‌كرى وئاریشه چێكرین نونه‌راتیا خه‌لكێ پارێزگه‌هێ ناكه‌ن وبابه‌ت ژكونترولێ ده‌ركه‌فت وئه‌م ته‌حمولا به‌رپرسیاریێ دكه‌ین وبناڤێ كارگێریا پارێزگه‌هێ وژورا ئوپه‌راسیونا داخازا لێبورینێ ژبریندارا دكه‌ین و سلامه‌تیێ بو دخازین وجهێ خوشحالیێ هه‌موو بریندار چاكبوینه وقه‌ستا مالێن خوكریه.
پارێزگه‌رێ دهوكێ ته‌كه‌زكر كو دڤێت خه‌لك یێ هه‌ڤكاربیت دگه‌ل تیمێن ته‌ندورستى ویێن ئێمناهیێ وهه‌موو ل دوڤ رێنمایێن ته‌ندورستى كاربكه‌ن و هاولاتى ده‌مامك وده‌ستگوركا ب كاربینن و ژهه‌ڤدوو دوركه‌ڤن وخو باش ب پارێزن وجهێ داخێ یه ل گه‌له‌ك جها رێنمایێن ته‌ندورستى وه‌كو پێدڤى ناهێنه بجهئینان ویێ پێگریێ ب رێنما نه‌كه‌ت دێ پێرابون به‌رامبه‌ر هێنه وه‌گرتن.
پارێزگه‌رێ دهوكێ دوپاتكر كو په‌تایا كورونا یا مه‌ترسیدار وبه‌لاڤبونا وێ هێشتا ب دوماهى نه‌هاتیه ونه‌دوره ل مه‌ها نه‌ه وده‌ه پێله‌كا دى یا ڤایروسى په‌یداببیت ودڤێت ئه‌م دهشیاربین وبه‌رده‌ومبین ل سه‌ر بجهئینانا رێنما و بریارێن حكومه‌تا كوردستانێ هه‌تا ره‌وش ب تومامى ئاسایى دبیت.
سه‌باره‌ت ئه‌وحاله‌تێ نوو یێ ل پارێزگه‌هێ په‌یدابوى گوت: ئه‌و كه‌یسا په‌یدابوى نوشداره‌كێ ساخله‌میا پارێزگه‌هێ یه وبه‌رى نوكه مه ئاماژه دابو كو مترسیا ڤایروسى ب دوماهى نه‌هاتیه وهیڤى دارین خه‌لكێ مه یێ هه‌ڤكاربیت وخو پارێزن وسه‌ره‌دانێن جڤاكى بهێنه كێمكرن و ژبه‌ر په‌یدابونا ڤێ كه‌یسێ به‌رنامێ ئاسانكاریا یێ قوناغا 7 هاته پاشئێخستن ودماوێ بهێت دا ئاسانكارى دێ هێنه كرن .
هه‌روه‌سا رێڤه‌به‌رێ گشتى یێ ساخله‌میێ ل دور كه‌یسا په‌یدابوى گوت: 17روژا مه چ كه‌یس نه‌بون لێ مه‌ترسیا كورونا هه‌ر یا به‌رده‌وامه ومه ده‌ست ب پشكنینا كربو بو وان كه‌سا ئه‌وێن ل هێلا ئێكێ كاردكه‌ن ژپه‌رستارا ونوشدار وروژنامه‌ڤانا ژى وئه‌وێ توشبوى نوشداره‌كێ ساخله‌میا پارێزگه‌هێ یه وژیێ وى 46سالن وئه‌م یێ دوڤ چونێ دكه‌ین كا چاوا توش بویه هیڤى دارین خه‌لكێ مه خو ب پارێزن .
