ئه‌ڤرو سپێدێ 23/7/2020 به‌رێز د.على ته‌ته‌ر پارێزگه‌رێ دهۆكێ پێشوازیا به‌رێز(نى رو تشتى) كونسلێ گشتى یێ وه‌لاتێ چینێ ل هه‌رێما كوردستانێ كر.
دهه‌ڤدیتنه‌كێدا به‌حسێ په‌یوه‌ندیێن دوو قولى دبیاڤێ ئابورى وبازرگانى وكلتورى دناڤبه‌را وه‌لاتێ چینێ وهه‌رێما كوردستانێ ب گشتى وپارێزگه‌ها دهۆكێ ب تایبه‌تى وچاوانیا پێشئێخستنا ئاستێ وان په‌یوه‌ندیان هاته كرن .
دته‌وه‌ركێ دن دا به‌حسێ ڤایروسێ كۆرونا وكارتێكرنا وێ په‌تایێ ل سه‌ر هه‌موو بوارێن ژیانێ ورێكارێن خو پاراستنێ یێن كو ل سه‌ر ئاستێ نیڤ ده‌وله‌تى وهه‌رێمى گرتینه به‌ر كو كارتێكرنا وێ ل سه‌ر ژیانا مروڤان بهێته كێمكرن هاته كرن.
كونسلێ چینێ پیروزباهیا پارێزگه‌رێ دهوكێ كر ب هه‌لكه‌فتا وه‌رگرتنا به‌رپرسیاریا پارێزگه‌هێ و ته‌كه‌زكر كو وه‌لاتێ چینێ دێ به‌رده‌وامیێ ده‌ته خورتكرنا په‌یوه‌ندیێن خو دگه‌ل هه‌رێمێ ب گشتى وپارێزگه‌ها دهوكێ ب تایبه‌تى وگوت: په‌ویه‌ندیێن چینێ دگه‌ل ملله‌تێ كورد دره‌سه‌نن وڤه‌دگه‌رن بو به‌رى دوو هزار ساڵا ده‌مێ ئالوگوریا بازرگانى ب رێیا كه‌ڤن (حه‌ریر) دهاته كرن ول چه‌رخێ ده‌رباوزبوى ژى په‌یوه‌ندى چینێ دگه‌ل حزبێن كوردستانى هه‌بوینه ونوكه‌ژى مه په‌یوه‌ندیێن خورت دگه‌ل حكومه‌تا هه‌رێمێ هه‌نه دهه‌موو بیاڤاندا وئه‌م دئاماده‌ینه په‌یوه‌ندیێن خو پتر پێشبێخین وپتر پشته‌ڤانیا حكومه‌تا هه‌رێما كوردستانێ بكه‌ین نه‌خاسمه پشتى شه‌رێ داعش ب دوماهى هاتى وقوناغا ئاڤه‌دانكرنێ ده‌ست پێ دكه‌ت.
ژلایێ خوڤه پارێزگه‌رێ دهۆكێ خوشحالیا خو ب سه‌ره‌دانێ دیاركر وسوپاسیا كونسلێ چینێ كر بۆ پیروباهیكرنا پوستێ پارێزگه‌هێ وته‌كه‌زكر كو چین وه‌لاته‌كێ خودان به‌رهه‌م وب هێزه وبه‌رهه‌مێن چینى ل ناڤا هه‌ر ماڵكا كورد هه‌نه وخواست كو رۆژ بۆ رۆژێ په‌یوه‌ندیێن هه‌رێمێ وده‌وله‌تا چینێ بهێنه خورتكرن وپشته‌ڤانیا پارێزگه‌هێ نیشان دا بو به‌رفره‌هكرنا وان په‌یوه‌ندیان و دهه‌موو واره‌كیدا.
