ئه‌ڤرو پشتى نیڤرو 8/7/2020 به‌رێز د.على ته‌ته‌ر پارێزگه‌رێ دهۆَكێ ب ئاماده‌بونا به‌رێز ماجد سه‌ید صالح جێگرێ پارێزگه‌رێ دهۆكێ ب وه‌كاله‌ت پێشوازیا به‌رێزان (نه‌جم جبۆرى)پارێزگه‌رێ پارێزگه‌ها نه‌ینه‌وا و(سیروان رۆژبه‌یانى) جێگرێ پارێزگه‌رێ نه‌ینه‌وا وعلى خه‌لیل به‌رپرسێ لقێ 14یێ پارتى وشاندێ ل گه‌ل كر .
دهه‌ڤدیتنه‌كێدا به‌حسێ ره‌وشا خه‌لكێ هه‌ردوو پارێزگه‌ها وپه‌یوه‌ندیێن دێرین یێن كومه‌ڵایه‌تى دناڤبه‌را هه‌موو پێكهاته‌یان ل سنورێ هه‌ردوو پارێزگه‌ها هاته كرن.
هه‌روه‌سا به‌حسێ ره‌وشا ته‌ندورستى وپێرابونێن خوپاراستنێ ژڤایروسێ كورونا ئه‌وێن لسه‌ر ئاستێ هه‌ردوو پارێزگه‌هان هاتینه هاڤێتن بۆ به‌رهنگاربونا وێ په‌تایێ وهه‌ماهه‌نگى دناڤبه‌را هه‌ردوو ئالیان بوگه‌هاندنا پروژێن خزمه‌تگوزارى هاته كرن.
هه‌ردوو لا ته‌كه‌زى ل سه‌ر خۆرتكرنا هه‌ماهه‌نگیێ دناڤبه‌را هه‌ردوو پارێزگه‌هان دا كر بۆ یه‌كێ كو ره‌وشا گشتى باشتر بهێته پاراستن .
بڤێ هه‌لكه‌فتێ پارێزگه‌رێ نه‌ینه‌وا پیرۆزباهیا پارێزگه‌رێ دهۆكێ كر وداخازا سه‌ركه‌فتنێ بو خواست وبه‌رهه‌ڤیا پارێزگه‌ها نه‌ینه‌وا نیشان دا بو هه‌ر هه‌ڤكاریه‌كێ بۆ وێ یه‌كێ خزمه‌تا خه‌لكێ هه‌دوو پارێزگه‌هان باشتر بهێته كرن.
ژلایێ خۆڤه د.على ته‌ته‌ر پارێزگه‌رێ دهۆكێ بخێر هاتنا پارێزگه‌رێ نه‌ینه‌وا كر وته‌كه‌زكر كو چ جیاوازى دناڤبه‌را خه‌لكێ پارێزگه‌ها دهۆكێ وپارێزگه‌ها نه‌ینه‌وا نینه وره‌وشا نوكه دخازیت كۆ ئه‌م هه‌ردوو لا ب هه‌ڤرا هه‌ڤكاریێ بكه‌ین وهه‌موو كارێن خو ب هه‌ماهه‌نگى ئه‌نجامده‌ین وباشتر رێكبێخین تایبه‌تى دبیاڤێ بجهئینانا رێنمایێن خو پاراستنێ ژڤایروسێ كورونا.
سه‌باره‌ت ئه‌نجامدانا پرۆژێن خزمه‌تكارى گۆت: دێ هه‌موو ئاسانكاریا كه‌ین بۆ یه‌كێ كۆ پرۆژێن خزمه‌تكارى ل ده‌ڤه‌رێن شێخان وزیلكان وفه‌یدیێ وجهێن دى ب باشترین شێوه بو خه‌لكێ ده‌ڤه‌رێ بهێنه ئه‌نجامدان.
