ئه‌ڤرو پشتی نیڤرو 10-2-2016به‌رێز فه‌رهاد ئه‌مین ئه‌تروشی پارێزگه‌رێ دهوكێ كومبونه‌ك دگه‌ل ژماره سه‌ندیكا ورێڤه‌به‌ریێن میری یێن په‌یوه‌ندیدار ل سنورێ پارێزگه‌ها دهوكێ سازكر.
دكومبونێدا ب ئاماده‌بونا هه‌ردوو جێگرێن پارێزگه‌ری به‌حسێ قه‌یرانا دارایی وئابوری وكێمكرنا موچێن فه‌رمانبه‌ران وكارتێكرنێ وێ قه‌یرانێ ل سه‌ر ژیانا روژانه یا وه‌لاتیان وهه‌ولێن حكومه‌تا كوردستانێ وكارگێریا پارێزگه‌هێ بو كێمكرنا بهایێن كه‌ل وپه‌لا وخزمه‌تكاریان ل ناڤ بازاری ب گشتی هاته كرن.
دكومبونێدا پارێزگه‌رێ دهوكێ دیاركر كو دڤێت هه‌موو لایه‌ن هاریكاربن بو كێمكرنا بهایێ هه‌ر تشته‌كی یان خزمه‌تكارییه‌كێ لناڤ بازاری بو وێ یه‌كێ كو ئه‌و كێمكرن بگونجیت دگه‌ل ره‌وشا نوكه یا خه‌لكێ پارێزگه‌هێ وته‌كه‌زكر كو دڤێت ئه‌م وه‌كو پارێزگه‌ها دهوكێ ده‌ستپێشخه‌ربین ومونافسێ دناڤبه‌را كومپانیا وسازیێن خزمه‌تكاری دا چێكه‌ین دا بهایێ هه‌ر تشته‌كی بهێته كێمكرن كو بگونجیت دگه‌ل داهاتێ هه‌ر وه‌لاتییه‌كی وژ پشكدارێن كومبونێ خواست كو بله‌ز ڤه‌كولین ودوڤ چونا لناڤ بازرای بكه‌ن وراپورتا ئاماده‌كه‌ن ل دور چوانیا كێمكرنا بهایێ كه‌ل وپه‌لا وخزمه‌تكاریێن گرێدای ب ژیانا روژانه یا وه‌لاتیانڤه وئه‌و راپورت یا ئاماده‌بیت دا ل كومبونه‌كا دی یا نێزیك بریارێن پێدڤی ل سه‌ر بهێنه دان كو دبه‌رژه‌وه‌ندیا گشتی یا خه‌لكێ پارێزگه‌هێ دابیت.
پاش گه‌نگه‌شێن تێروته‌سه‌ل ل دور بابه‌تی هاتنه كرن.
هه‌ژی گوتنێ یه ئه‌و سه‌كته‌رێن بریاره راپورت وڤه‌كولین ل سه‌ر بهێنه كرن كو بهایێن وان بهێنه كێمكرن ئه‌ڤه‌نه (ڤه‌گوهاستن- ساخله‌می- كه‌ل وپه‌لێن خارنێ – كرێ یا ئاڤاهییان).
