ئه‌ڤرو ئێڤارى 6- 6 -2020 به‌رێز فه‌رهاد ئه‌مین ئه‌تروشى پارێزگه‌رێ دهوكێ ب ئاماده‌بونا به‌رێزان قایمقامێ قه‌زا سێمێلێ و رێڤه‌به‌رێ گشتى یێ ساخله‌میا پارێزگه‌هێ و خودانێ كومپانیا لالاڤ گروپ نه‌خوشخانا لالاڤ بو نه‌ساخێن ڤایروسێ كورونا ل سنورێ ناحیا فه‌یدیێ ڤه‌كر .
پارێزگه‌رێ دهوكێ گه‌ریانه‌ك لناڤ ژور وكارگێریا نه‌خوشخانێ كر وژنێزیك سه‌حكره به‌رهه‌ڤیا نه‌خوشخانێ بو پێشوازیكرنا نه‌ساخێن ڤایروسێ كورونا .
پارێزگه‌رێ دهوكێ دكونگره‌كێ روژنامه‌ڤانیدا ئاماژه دا ره‌وشا نه‌باش یا ساخه‌میێ وبه‌لاڤبونا بله‌ز یا ڤایروسێ كورونا ل جیهانێ وعیراقێ وكوردستانێ وته‌كه‌زكر كو حاله‌تێن كورونا روژ بو روژێ دزێده‌وبنێ دا یه ومرن ژى زێده‌بویه وئه‌ڤ ره‌وشه دخوازیت كو مروڤ پتر پێگریێ ب رێنما یێن خو پاراستنێ بكه‌ت .
هه‌روه‌سا گوت : ل ده‌ستپێكێ مه وه‌كو حكومه‌ت هزرا ئاڤاكرنا نه‌خوشخه‌كا تایبه‌ت بو نه‌ساخێن كورونا كر لێ جهێ خوشحالیێ یه خێر خاز حجى چولى ئه‌ڤ ئه‌ركه ب ستوخوڤه گرت وئه‌ڤ نه‌خوشخانا رێك وپێك ئاڤاكر ئه‌ز بناڤێ كارگێَریا پارێزگه‌هێ ده‌ست خوشى وسوپاسیێ ل وه‌به‌رهێنه‌ر وخێرخاز حجى چولى وگروپێ لالاڤ دكه‌م ل دور ڤێ ده‌ست پێشخه‌ریێ كو ئه‌ڤ نه‌خوشخانه بو نه‌ساخێن ڤایروسێ كورونا ئاڤاكریه وئێخستیه دخزمه‌تا ساخله‌میێ دا. وئێكه‌مین نه‌خوشخانه‌یه بڤى ره‌نگى خێر خازه‌ك ل سنورێ پارێزگه‌هێ لڤێ ده‌ڤه‌رێ ئاڤادكه‌ت وخواست كو سه‌رمایه‌دار چاڤ ل خێر خاز حجى چولى بكه‌ن .
هه‌روه‌سا ته‌كه‌زكر وگوت : ئه‌و پێرابون وبریارێن ئه‌م ده‌ردكه‌ین هه‌موو ژبو پاراستنا ساخله‌میا وه‌لاتیێن پارێزگه‌هێ یه ودێ به‌رده‌وامیێ ده‌ینه بجه ئینانا وان بریار ورێنمایا وهیڤى دارین خه‌لكێ ژى یێ هاریكاربیت و خو ب پارێزین چونكو مترسیا ڤایروسێ كورونا ب دوماهى نه‌هاتیه وسوپاسیا تیمێن ساخله‌میێ ورێڤه‌به‌ریا ئاڤه‌دانكرنێ وهه‌موو لایه‌نان كر كو ئه‌ڤ نه‌خوشخانه ب ته‌رزه‌كێ باش ئاڤاكریه .
هه‌روه‌سا خێر خاز حجى چولى دپه‌یڤه‌كێدا ته‌كه‌زكر كو ئه‌و كارێ لالاڤ گروپ كرى خزمه‌ته‌كا هه‌ژى یه بو خه‌لكێ پارێزگه‌هێ.
ژلایێ خوڤه رێڤه‌به‌رێ گشتى یێ ساخله‌میێ بناڤێ رێڤه‌به‌ریا گشتى یا ساخله‌میێ سوپاسیا خێرخاز حجى چولى كر بو ئاڤاكرنا ڤێ نه‌خوشخانێ و گرنگیا ڤه‌كرنا نه‌خوشخانێ به‌رچاڤكر وگوت دێ بیته هاریكار بو نه‌ساخێن ڤایروسێ كورونا وبارێ نه‌خوشخانێن دى دێ هێته سڤكرن.
هه‌ژى گوتنێ یه نه‌خوشخانا لالاڤ ل سه‌ر روبه‌رێ 26هزار مترێن دووجار هاتیه ئاڤاكرن بكوژمێ ملیونه‌ك و800هزار دولارا و100ته‌ختا بخوڤه‌دگریت وپارك وگه‌راج وباخچه دناڤداهه‌نه ودماوێ 33روژاندا هاتیه ئاڤاكرن.
